Mizoram Legislative Assembly Budget Session nei tan

March ni 10 thleng awh tur, Mizoram Legislative Assembly Budget Session chu nimin khan Speaker Lalrinliana Sailo kaihhruaia neih ṭam a ni.

Tihdan pangngaiin nimin, session ṭan ni-ah Lârsap Dr. Hari Babu Kambhampati chuan house-ah thu a sawi a, Larsap thusawi chunga lawmthu sawina motion chu MNF member K.Laldawngliana’n a pu lut a, MNF member tho Lalrinsanga Ralte-in a thlâwp a, vawiinah member-ten an sawiho zui ang.

Larsap Hari Babu Kambhampati chuan nimin session-a thu a sawinaah hrileng avangin sawrkar chuan harsatna hrang hrang tawk mahse, sawrkar chungah rinna a nghat tlat tih a sawi a, heng harsatna hrang hrangte hi sawrkar chuan paltlangin a hmuingil chhunzawm zel a beisei tlat tih a sawi a, mi hnuaihnung te aṭanga a chung lam thleng nghawng pha hmasawnna kawng zawh tura chahin, ṭhan zelna tur kawng dap chu ngaih pawimawh berah neih ni se a ti.

Larsap chuan session inkhawm chhungin tluang taka rorel theih a beisei tih a sawi a, member-te chu house zahawmna kengkawh tlat tur leh mahni mawhphurhna leh tihtur leh tih loh turte hre thar a, rah ṭha tak chhuah tur sawihona nei turin a sawm a, sawrkar kum kal mek chhunga Mizoram sawrkarin hma-sawnna hna hrang hrang a thawhte leh, thutlukna pawimawh a siamte bakah, Mizoram kaihhnawih thil pawimawh thlengte a sawi lang bawk a ni.

Vawiinah session hi neih chhunzawm a ni ang a, ṭan a nih veleh session hnuhnung ber leh tun session inkâra member hlui thite sûnna hun hman a ni ang a, hemi hnu hian zawhna leh chhànna hun hman a ni ang a, chumi zawhah Lârsap thusawi chungchânga MNF member K.Laldawngliana lawmthu sawina motion sawiho a ni ang.