Zothlifim Logo
Loading ...

Forest Survey of India Satellite chuan January 2021 atanga nimin thleng khan Mizoramah ram kâng hi hmun 12,726-ah a hmu.

He thu hi nimina Chief Minister Zoramthanga hova Synod Conference Centre, Aizawla Mizoram puma hman tur, Kangmei Ven Hapta (Fire Prevention Week), 2022 hawnna inkhawmah sawilan a ni a, FSI-in ram kang a hmuh aṭanga Spot verification report angin November 2020-May 2021 chhunga hmuh chu hmun 4,486 a ni a, chu chu 14153.08 Ha. vel a ni. Hemi kâng atang hian hmun 205 (2562.18 Ha.) chu sawrkar ramngaw kang niin hmun 4281 (11590.9 Ha.) chu vantlang leh mimal ram kang, bawlhhlawh hal leh lo hal aṭangin a ni.

He hunah hian Hapta hawngtu, Chief Minister chuan kangmei chhuak tam tak chu vên theih thil a nih avangin leh, kangmei laka invênhim chu kan ngaih pawimawh phawt chuan kan ram hi nasa takin hma kan sawn tur thu a sawi a, Kangmei chhuak tam tak chu lo halna atanga chhuak a nih avangin permanent land holding system – ram nghet neih a, agriculture lam a ni emaw, horticulture a ni emaw, forest plantation a ni emaw, chung chu eizawnna tha, economy chawisangtu a nih mai bakah ram kang laka invenna tha tak pakhat a nih tel tur thu a sawi bawk.

He huna thusawitu dang, Environment, Forest & Climate Change Minister TJ Lalnuntluanga chuan Forest Survey of India report-in Mizoram pum chhûtin 28.28% chu kangmei chhuah hlauhawm berna hmunah puangin, 49.73% chu kangmei chhuah hlauhawmna leh, kangmei chhuah hlauhawm lohna chu 2.2% chauh a nih thu a sawi a, heng a nih avang hian mzioram sawrkar chuan kangmei ven chu a ngaihpawimawh thu a sawi a, District leh khaw tina kangmei ven kawnga hmalakna hriatpui nan leh intihphur tawn nan a kumtin state level leh district level lawmman buatsaih a nih thu a sawi bawk.

He hun hi Jitendra Kumar, Principal Secretary & PCCF, EF&CC Department chuan kaihruaiin, Laltlanhlua Zathang, Member Secretary, State Level Sub Committee hnen aṭangin report ngaihthlak a ni a, sawrkar laipui in ramngaw kang vên nan CSS scheme – Forest Fire Prevention & Management Scheme a nei a. Kumtin cheng nuai 100 vel state a rawn pe ṭhin a (2019–20-ah ₹108.12 lakh, 2020–21-ah ₹114.28 lakh, 2021–22-ah ₹87.19 lakh). Ram pum leh district Level Committee-ah he pawisa hi sawrkar ramngaw chauh ni lo-in vantlang ram ven nan pawh hman tel a ni ṭhin a, kum 2021 khan District tinte chuan mei kawng (firelines) siam leh kangmei vengtu (firewatcher)-te ruaiin kangmei venna kawngah nasa takin ṭan an la a, ruahtui tlak tlem avangin ramkang hi kum dang aiin a nasa a, chhim lamah phei chuan vanduaithlak takin an tuar nasa leh zual a ni.