Nimin khan SEDP hnuaia Higher & Technical Board chu Higher & Tehnical Education enkawltu Minister Dr. R.Lalthangliana, he Board Chairman ni bawk hovin SAD Conference Hall-ah an ṭhukhawm a, zirna sâng zawk tihhmasawn nana hmalâk dan tur kawng hrang hrang an sawiho a ni.

Health Minister chuan sawrkar flagship prog-ramme kalpui mek SEDP chu sawrkar hmasaten hmasawnna policy an lo kalpui tawh ṭhin aia a huam zau thu sawiin, he ruahman-na hnuaiah hian thil tam tak a lengin a awm a, sawrkar rorelna leh inawpnna kalpui dan thlengin SEDP-in a huam a, chuvangin Board hrang hrang kalpui dan pawh a inang thei lo a ni, a ti a. Sawrkar Budget tibuai lova hmun dang atanga sum ruahmanna leh tihdan ngaihtuah chu a ngaih pawimawh thu sawiin, sum sên ngai em em lo ang chi, zirlaite kawng hranga fuih leh an ngaihtuahna bakah an thiamna tihzau leh tihpun nan awareness neihte chu zirna boruak siamṭhat nan a ṭangkai thei nia a ngaih thute a sawi.

Esther Lalruatkimi, Commissioner & Secretary, Higher & Technical Education chuan zirna chungchanga hmalakna reng rengin engtinnge zirna a nghawng teh nan hun a duh rei thu sawiin, Board hnuaia hmalakna tur duannaah zirlaiten an hlâwkpui leh an ṭangkaipui thei ang chi thil hrang hrangte ngaih pawimawh hmasak ṭul nia a hriat thu a sawi lang a ni.

Meeting-ah hian College hrang hranga Skill Development Course hrang hrang kalpui theih dan chungchang te, College-a zirtirtu indaih loh phuruk nana hmalak dan chung-chang te, College ṭhenkhata PG zirna hawn a nih theih dan kawng zawn chungchang te, College Library-te tihchangtlun chungchangte chu zau taka sawiho a ni a, Mizorama B.Ed. zirna hmun 4 tuna awm mek bakah hmun dangah pawh he degree zir theihna neih a ṭul thu leh hmalak dan tur chungchangte pawh sawilan a ni.

Meeting-ah hian Board Member-te bakah Mizoram University Registrar leh Director College Development Council bakah Mizoram College Teachers’ Association aiawhte an tel a ni.