BJP Mizoram chuan Mizoram sawrkar kalphung diklo, thuneihna hmangsualtute hrem an nih theih nan Governor hnenah High Level Enquiry din turin thlen an tum thu an sawi.
Nimin khan BJP Mizoram hruaitute hian Aizawlah thuthar lakhawm-tute kawmin, tun thla ni 11-a sawrkar laipui Rural Development Minister Faggan Singh Kulaste Aizawla lo kal chuan Governor Dr. Hari Babu Kambhampati leh Mizoram BJP hotute hnenah Mizoram sawrkarin MGN REGS a kalpui chungchanga Central sum sanction State sawrkarin a lo hman ral dan chungchang dik lote a hmuchiang hle niin an sawi a, Union Minister hian sawrkar laipui Scheme leh Programme-te mipuiin rualkhai leh a tam thei ang bera an chhawr theih tura hmalak a ṭul thute sawiin, political party-a awmte chuan sawrkar kalsual pawh sawisel ngam a, a vengtu tur an nih thu a sawi bawhzuiin hma an la nghal tih an sawi.
BJP Mizoram chuan Central sawrkarin thing-tlang mipuite dawmkan nana MGNREG Act 2005 a siam chu Mizo-ram pawhin kum 2009-ah he a hmang ṭan a, state MGN REGS chungchanga thunei sang ber Mizoram State Employment Guarantee Council-ah hian mipui lam Non- Official mi 15 aia tam lo tel tur a ni a, chumi zingah chuan hmun thuma ṭhena hmun khat hmeichhia an ni tur a ni tih a nih thu sawiin, State Employment Guarantee Council-a hmeichhe chanvo member 5 chu ruat fel nghal turin Mizoram sawrkar chu an phût a, MGNREGS dan chuan State Employment Guarantee Council Body ruat dan felfai a siam a, Mizoram State Employment Guarantee Council Body an siam dan aṭang erawh chuan MGNREG Act bawhchhiat nghal a ni an ti.
Central Sawrkar chuan MGNREGS funding thu-ah State tin sawrkarten an dil ang zelin sum a pe a, State duhsak bik an awmlo th sawiin, ni 11 February, 2019 khan State Employment Guarantee Council phuah-chawp tak chu an ṭhukhawm a, an thurel chu mipui inhlawhna (Wage Component) leh Material Component 60:40 ratio ni rawh se, tih a ni a, Material component (MC) works-ah hian 40% District(DEC) thuneihna, 30% Block(BEC) thuneihna, 30% Village (VEC) thuneihna a siam ve ringawt chu MGNREG dan kalh a ni a, thuneihna hmansualna nasa tak leh eirukna khurpui ruahmanna a ni, an ti a. Mipui inhlawhna Job Card Holder account a lut cheng nuaih 10000 ni se, cheng nuaih 4000 Material Component a lo chhuak ṭhin a, he Material Component sum leh pai MNF sawrkarin a hmanral dan hi District Level leh Block Level-ah Meeting a ngaihtuahna awm hauh lovin, cheng nuaih sing tam tak hmanral a ni tawh tih an sawi a, heng MC pawisa hmang hian ruling party headquarter mi invulh nan an hmang tih sawiin, thingtlang mite chanvo liau liau khawpui miin an chhuhsakna a ni, an ti bawk a, hetiang ruahmanna State sawrkar meuhin a siam hi Central RD Minister pawhin mak a ti takzet a ni an ti.
Rualkhai taka thingtlang economy tlahniam dawmkân kan duh takzet chuan MGNREGS khawtin job card neih aṭangin Material component hna hi rualkhai taka semzai mai tur a ni an ti a, Ran Chaw leina (Fodder Scam) mipui sum tihchinpen vanga Bihar CM hlui Lalu Prasad Yadav leh IAS Officers, Official 40 chuang rorelna Court in thiamloh a chantirna nen ang khat rengah BJP Mizoram chuan a ngai tih sawiin, Union Rural Development Minister-in ngai pawimawha a chah angin, Mizoram State sawrkarin thingtlang hmasawnna tura Central Scheme & Prog-ramme a tihchingpen dangte pawh Report siamin Governor leh Union Ministry-ah an thlen zel dawn tih an sawi bawk.