Assembly session, zawhna leh chhanna hunah PWD changtu chief minister Zoramthanga chuan Bawngkawn junction leh Vaivakawn junction-ah motor kawng chhawng siam tum a nih thu, CLP leader Zodintluanga Ralte zawhna chhangin a sawi a, kawng chhawng siamna hi thlan fel tawh niin draft feasibility report hi consultancy firm Telecommunication Consultant India Ltd in an rawn submit tawh a nih bakah central ministry-ah approve tura thawn tawh niin approval hi nghah mek a nih thu a sawi.
ZPM leader Lalduhoma zawhna chhangin chief minister chuan kum 2019 khan Bhavya Construction Ltd hnenah Zophai (Bairabi) kawng siam tura pek a ni a, “Agreement awm lovin NEDP sum aṭanga pek a ni,” a ti. March 2019 ah hna hi thawhṭan a ni a, nikum December thla khan zawhfel a nih tawh thu a sawi. CM chuan NH-302 (Lunglei-Tlabung) kawng laihah contractor M/S SRK Construction & Project Pvt Ltd an nih thu Congress member Nihar Kanti Chakma zawhna chhangin a sawi. “Project cost chu Rs. vbch 839.98 a ni a, Pakage I zawh hun tura ruat hi 31.12.2022 a ni a, package-II hi 9.1.2023 ah zawh tur a ni,” a ti. Commerce & Industries changtu minister
Dr R Lalthangliana pawhin Indo-Myanmar Border Trade Point – Zokhawtharah sorkarin chak takin hma a la tih a sawi. MNF member ZR Thiamsanga zawhna chhangin minister chuan central sorkar aṭangin Special Assistance to State under Capital Expenditure aṭangin Rs. 1500 lakh hmuh a ni a, “He sum hmang hian Land Customs Station chu Infrastructure tih changtlunna turin project siam niin immigration check post, animal quarantine station, plant quarantine station, laboratory, food testing laboratory atana building awmsa thuam ṭhat, weight bridge siamṭhat, ware house siamṭhat bakah officers & staff quarters sak tura ruahman a ni,” tiin contractor tur pawh thlan fel tawh niin mobilization of works kalpui mek a nih thu a sawi. Indo-Bangladesh Border Trade pawh sawiin Kawrpuichhuahah Integrated Check Post fencing atan Land Preparation tih zawh thawkhat a ni a, fencing post phun tura hmalak mek a nih thu a sawi. “A project pumpui design pawh peihfel tawh a ni a, DPR pawh Land Port Authority of India in a pawm tawh. Forest Clearance atan Revenue department-in hma an la mek,” a ti. Mizoram chuan Indo-Bangladesh Border Haat atan pilot projectah Sisuri (Mamit District) a ruahman a ni a, lehkha pawimawh te pawh thawn thlak tawh niin sorkar laipui chuan Bangladesh sorkar remtihna la turin hma an la mek niin a sawi.
MNF member Lawmawma Tochhawng zawhbelhna chhangin khaw 4 – Tuipuibari, Silsuri, Marpara leh Nunsuri-ah te Border Haat din tuma hmalak mek a ni a ti.
Hetih lai hian MNF member C Lalmuanpuia zawhna chhangin Lunglei Super Market sakṭhat tuma hmalak mek a nih thu a sawi a, DPR Rs. 1450 lakhs chu NEC ah thehluh a nih thu leh project hmingah Lunglei Market & Trade Centre tih a ni a, NEC hnuaiah Standing Finance Committee chuan pawm tawhin sum hi tun financial year chhunga sanction beisei a ni a ti.
Information & Communication Technilogy deptt changtu minister Robert Romawia Royte pawhin kum 2021-22 chhunga ICT department Annual Budget chu Rs. 459.27 lakhs a nih thu MNF member Zothantluanga zawhna chhangin a sawi. ICT hnathawh tlangpuite chu secretariat leh CM office internet connection enkawl te, department hrang hrang website siamsak leh enkawlpui te, sorkar office hrang hrang computerize tura hmalakpuite, IT education, Telecom service leh internet service enkawl te, State Data Centre enkawl te leh IT awareness campaign, workshop leh training pek te a nih thu a sawi bawk.
Hei bakah Congress member Nihar Kanti Chakma zawhna chhangin minister chuan West Tuipui bialah mobile network leh internet service ṭha a awm theihnan sorkarin theihtawp chhuahin hma ala mek tih a sawi.
Land, Resources, Soil & Water Conservation minister R Lalzirliana chuan an department-ah kum 2020-23 atan SEDP hnuaiah Kuhva leh Hmunphiahah ruahmanna siam a nih thu MNF member Dr K Pachhunga zawhna chhangin a sawi. Kum 2021-22 chhungin NABARD RIDF XXIII hnuaiah Rubber Plantation & Development Project thawh a ni a, kum 2021-22 chhung hian 4th installment thawh niin project cost hi Rs. 81.22 lakhs a ni. Rengdil leh Kanghmun, Mamit district-ah thawh a ni tih a sawi bawk.