Nimina Assembly Session-ah Home Minister Lalchamliana chuan nimin zinga Mizoram Police-te’n Manipura vanduaina an tawh chungchang House a hrilh.
Home Minister sawi dan chuan sawrkar laipui Ministry of Home Affairs thupek angin Mizoram State Armed Police Force Company 10 te chu Manipur General Election thawh khatna February ni 28 leh Election thawh hnihna lo awm tur March ni 5-a Duty turin Mizoram sawrkar chuan February ni 15-ah a tir a, tluang taka an duty-na tur thlengin Election thawh khatna February ni 28-a neihah Bisnapur District-ah duty-tir an ni a, inthlan thawh hnihnaa duty turin Tamenglong District-ah duty tura tirh an ni a.
Tamenglong District-a an thlenna hmun Tamenglong College chu motor lian a luh theih loh avangin motor lian thlen theihna chin atangin pickup-in an inthiar a, an inthiar zawh dawna a hnuhnung ber mi 11 chuanna Pickup chu break fail-in nimin zing dar 1:30-ah a chesual a, he chetsualnaah hian Constable No. 516, K. Lalawmpuia (2nd IR) Champhai khua chu a boral a, a ruang hi District Hospital-ah Postmortem tih theih a nih loh avangin Imphal-ah tih tura ruahman a ni a, hliam dangte pawh Helicopter-a Imphal lama phurh an ni.
Home Minister chuan Manipur sawrkar hotute biakpawh reng an ni a, K. Lalawmpuia ruang chu thlawhna hmanga thawn haw dan buaipui mek a ni, a ti a. Mizoram Police-te’n vanduaina an tawk chu pawi a tih thu a sawi a, lusun chhungte an thinlungin an tawrhpui tih sawiin, a ṭul apiang ti zel turin Police Headquarters leh Mizoram sawrkar a inring reng a ni, a ti.