Mizoram Larsap Hari Babu Kambhampati chuan Mizoram mipui tam zawkin Central Sawrkar Scheme aṭanga hamṭhatna an neih theihna tur chungchang Mizoram Baptist Kohhran Hruaitute a sawipui.
Nimina BCM kohhran hruaitute a kawmnaah Larsap chuan Mizoram hmun hrang hrang a tlawh hnu leh tlawmngai pawl hruaitute a kawm hnuah Mizoram mipui tam zawkin Central aṭanga Social Security Scheme ṭha tak takte an hriat loh avangin an dawng lo tih a hmuh chhuah thu a sawi a. Hei hi thinlung taka a vei thu sawiin, vawi tam tak Bank te, sawrkar Department hotute leh tlawmngai pawl hruaitute a kawmnaah pawh a sawi ṭhin thu a sawi a, Mizoram mipui tam thei ang berin Central Sawrkar atanga hamṭhatna an dawn chu an chanvo a ni a; tunah zirtirna tha tawk rih lo mah se hriattir ngei chu an chanvo a ni, a ti.
Larsap chuan Mizoramah Kohhran chu mipuite rawngbawltu pawimawh ber pakhat a ni a, mipuiin kohhran hruaitute thu an ngaichang a, kohhran hruaitute thusawi chuan zawm a hlawh a, hei vang hian mipuiten thil ṭha an dawn theihna turin Kohhran hruaitute chu an hun leh hmun remchang neihnaahte ṭhanemngai taka welfare scheme leh social security scheme te mipui zirtir turin a ngen a ni.
BCM hruaitute hi President Elect Rev. Dr. Zolawma’n a ho a, Larsap sawi ang hian heng scheme ṭha tak takte hi an hriat ngai loh deuh vek a ni a, hun remchang apiangah mipui zirtirna pawh kalpui ṭha an tih thu an sawi a ni.