Information & Public Relations Minister Lalruatkima chuan Social Media a thudik tawk lo leh Chanchinthar rintlak tawklo theh darh tam lutuk ṭhin chu ngaimawhawm a tih thu a sawi.
Nimin khan I&PR Minister hian a pisa-ah MJA Gen. Hqrs. hruaitu tharte léngah a sawm a, he hunah hian I&PR Minister chuan Social media kan hman danah kan society tana la ṭha lo tur khawpa hman sualna a tam tih sawiin, Youtube kaltlangtein Mizo ṭawng hmang dik mang lo a, thu thehdarh a tam a, Social Media-ah keimahni nihna dik tak pholang ngam tak tak mang si lo a, mi dik lohna emaw, thuthang dik tawk lo vawrh darh a tam ṭhin lutuk chu khawtlang (society) inrelbawl zelna turah thil ṭha lo zawk a hring thei tih a sawi a, fimhur thar a ṭul thu a sawi.
Lalruatkima chuan, MJA golden jubilee lawmna leh Gen. Conference tluang taka neih a ni chu lawmawm a tih thu sawiin, hruaitu tharte duhsakna a hlan a, press enclave chu bawhzui zel a la ni tih a sawi rualin, hmalakna a chak thei lo tih a sawi a, Journalist Pension Scheme a kal chho zel tih sawiin, “A la kal zel ang a, file a la kal mek a. Tihhlawhtlin hun kan nghakhlel a, a ṭul ang zelin hmalak kan tum,” a ti a. MJA member-te tan press tour leh Parliament training buatsaih chungchang leh advertisement rate chungchangte a sawi lang bawk.
MJA President C.Lalrambuatsaiha pawhin thu sawiin, press mite leh IPR department thawhhona a ṭha tih a sawi a, “Hetianga thawhhona ṭha hi state dangah a awm kher lo mai thei. MJA-te kawng tinréngah min duhsak ṭhin a, kan lawm hle a ni,” a ti a, advertisement, press tour, Journalist Welfare Fund chungchangte a sawi lang bawk a ni.
MJA Gen. Hqrs hruaitute leh IPR department hotute chuan journalist leh IPR department kaihhnawih thil chi hrang hrang an sawiho a ni.
Warning: Undefined variable $post in /home/lahj9ae7in9c/public_html/wp-content/themes/newsup/inc/ansar/hooks/hook-index-main.php on line 117