Chief Minister Zoramthanga chuan nimin khan Mizo Academy of Letters (MAL) din champha (Foundation Day) puala a lawmna hun Assembly Annex Conference Hall-a buatsaih a hmanpuinaah Book of the Year 2021 atana thlan ‘Hnam Ropuite U Tho R’u Le’ ziaktu Lalhruaitluanga Chawngte hnenah lawmman a hlan.
Chief Minister chuan ram buai avanga economy chauh nilo, literature thlenga Mizoramin a tawrh dan te, hun lo kal zela hma kan sawn dan leh tun thlenga hrileng leh harsatna hrang hrang karah Mizo literature-a tui leh hmasawnna duhtu ṭhahnem tak an awm chu lawmawm a tih thu a sawi a, ziakmite chu an thuziahah a êng lam, a ‘positive’ zawnga ziak hram tum turin a chah a, chumi ṭhatna chu ûmzui zelin, hmasawn-na raltiang a kai theih tur thu a sawi a ni.
Chief Minister hian MAL website thar- mizoacademyofletters.com chu tlangzarhin, Lalbiakzami lehkhabu ziah ‘Biakzami Biahzai’ tih chu a tlangzarh nghal bawk a ni.
Assembly Speaker Lalrinliana Sailo pawhin lehkhabu 3 – ‘Khawvel Indopui 2-na’ C.Lalaudinga ziah, ‘Mizo hla leh a phuah-tute’ B.Lalthangliana ziah leh ‘Mizo Nun Hlui – Lemchan Pathum’ tih Lalthangfala Sailo ziakte chu a tlangzarh a, mi 6 hnenah MAL Life Member Certificate a hlan bawk.
MAL-in Book of the Year a thlan hmasak ber aṭanga chhutin lawmman dawngtu mi 27 an awm tawh a, vawi hnih dawng hi mi 5 an awm a, Bangalore Mizo Christian Fellowship-in vawi khat a dawng tawh bawk.