Home » Chanchinthar » Vawiinah SEDP trade thlanfel vek a ni dawn:Tawnluia

Vawiinah SEDP trade thlanfel vek a ni dawn:Tawnluia

MNF Senior Vice President, Tawnluia, Deputy Chief Minister ni bawk chuan SEDP Governing Board, SEDP Executive Board, District Level Board din fel vek a ni tawh a, SEDP Village Board hi April thla chhunga ruatfel vek tur a ni a, Trade hi vawiin, April 26-ah thlan fel vek a ni dawn tih a sawi a, SEDP Board 14-te hi chu an kal ngaiin an kal reng dawn tih a sawi bawk.

Tawnluia hian nimina Mizo Hnam Runa MNF-a mi paruk lawmluhna hun a hmannaa a thusawinaah he thu hi a sawi a, Tawnluia chuan SEDP chu Zoram mipuite enkawl a, hmasawnna leh changkanna tura an duan a nih thu sawiin, “Hemi hi hriain SEDP hi mipuiin duhsakna min hlan chhan, sawrkarna min pek chhan a ni,” a ti.

An sawrkar tirh aṭangin an Flagship Programme chu kan kengkawh char char tho tih pawh sawiin, Zoram ruhrel siam nan – Kawng siam nan te, zirtirtu rawih nante an hmang tih a sawi a, “Mipui nawlpuiah hmalak pawh tum mah ila kum hnih zet inkharkhip chhung khan a theih chuang loh tih kan hre vek awm e. Tunah chuan mipui hne zawngin, beneficiary thlangin chhungkaw 60,000 hnenah ṭanpuina pe turin ruahmanna kan siam a. Constituency tinah chhungkaw 1,500 thlan chhuah hnenah ₹50,000 ṭheuh bul ṭan nan kan pe dawn a ni,” a ti.

Kuthnawthawktu leh mi harsa zawkte tana bul ṭan nana ruahman SEDP chu a dawngtuten an ṭangkaipui em em ang tih an ring tlat tih sawiin, SEDP-ah hian Chhungkaw lam hawi (Family oriented) bakah ram hmasawnna ruhrel (Infrastructure) – kawngpui, Lei dawh,, zirtirtu lak etc siamna tur an dah tel vek tih a sawi.

Tawnluia chuan, “Kan sawrkar hi Covid hripui leng karah a ṭhuthluang mai mai lova, hna hi kan thawk nasa a ni. Kan Ministry hian Central sum haichhuak tur hi chuan hma kan la nasa hlawm em em a ni,” a ti bawk.

Leave a Reply

This site uses Akismet to reduce spam. Learn how your comment data is processed.