Kumin March thla aṭanga vawk pul hri chi khat African Swine Fever (ASF) leng nawn leh avanga Mizorama vawk thi zat chu a pun belh zel a, ASF vang hian kuminah khua leh veng hrang hrang 39-ah vawk 2672 a thi tawh a ni.
ASF hi District hrang hrang 6-ah a leng mek a, nimin khan vawk 48 thih belh lehin, heng zingah hian ASF nia rinhlelh thi 25 awmin, vawk suat 86 a awm a, ASF vanga vawk suat tawh zawng zawng zat hi 2186 ani bawk.
Nikum March aṭanga nimin thlenga Mizorama ASF vanga vawk thi zat chu 30,208 a tling tawh a, March 2021 leh December 30, 2021 chhung khan Mizorama khua leh veng hrang hrang 272-ah ASF vangin vawk 29,824 a thi a, ni 35 chhung ASF vanga vawk thi a awm loh hnuah, February 4, 2022 khan ASF vanga vawk thi Champhaiah a awm leh ṭan a ni.
ASF hri kumina a lên thar leh hnua ASF vanga vawk thi tamna ber, Champhai district-a Farkawn khuaah chuan AH & Vety Department chhinchhiah danin, nimin thleng khan vawk 489 a thi tawh a ni.
Mamit district chhung, a bik takin Mamit khawpui chhunga vawk pul hri leng chuan ziaawm lam a pan thei rih lo a, Mamit khawpui chhung veng hrang hrangah vawk thi a awm belh zel a, vawk 63 vel a thi tawh a, hetia Mamita Vawk pul hri a len avang hian hrileng avanga vawk suat la awm mahse vawk hrisel Vety department-ten talh an phalte erawh an talh nasat phah hle a ni.