Nimin khan Dr. Vanlal-ṭanpuia, Chairman Mizoram Youth Commission leh New Delhi aṭanga Vision IAS aiawh lo kal Deepali Dutt Chaturvedi, Management Head: Vision IAS leh Utkarsh Chaturvedi, Marketing Team Head and Regional Centre Co-ordinator of Vision IAS-te chuan MYC Conference Hall-ah Super IAS 40 programme hnuaia MYC-in New Delhi-a Mizo ṭhalai full sponsorship a a tirh tur chungchang sawihoin a thuphungin inremna an nei.
MYC Chairman chuan Mizo ṭhalaite tan New Delhi-a IAS Coaching Centre ṭha ber ber a duh thu sawiin, chung zingah chuan Vision IAS pawh a ṭha berte zinga mi niin Mizo ṭhalaite tana hmun siamsak tur leh an awmna turte pawh lo ngaihtuahsak a, lo enkawl turin a duh thu a sawi a, Vision IAS aiawha lo kalte chuan MYC chungah lawmthu sawiin, Mizo ṭhalaite sawrkarin a ngaihsak an tih thu an sawi a, anni pawhin an theih ang tawka lo buaipui an inhuam thu sawiin, Mizo ṭhalaite chu seat an lo pek bakah an awmna tur hmun thlengin ruahmanna siamdan tur kawng an zawn tur thu an sawi.
Vision IAS hi India rama IAS Coaching Centre zingah chuan Reading Materials nei ṭha ber a sawi an ni a, kum 2020 chhung khan India ram pumah UPSC exam-ah Top 10 ah mi 10 neiin, 2019 ah top 10 ah mi 7 an lang bawk a ni.
MYC hian ṭhalai 40 a tirh turte hi Coaching Centre pakhatah dahkhawm vek lovin sem darh a tum a, Vision IAS bakah hian Coaching Centre ṭha dangte pawh koh mek an ni a, ruahmanna siampui zel an tum a ni.