Mizoram State Museum, Art & Culture Department huaihawtin International Museum Day chu Mizoram State Museum, Aizawlah hman a ni a, Art & Culture Department Joint Director Carol VLMS Dawngkimi’n a hawng a ni.
Carol VLMS Dawngkimi chuan Mizo hnam lo dinchhuah zelna tur leh Mizo hnam inpumkhat zelna turin Mizote nihna dik hriatchian a ngai tih a sawi a, chumi atan chuan Museum hian chakna tam tak a pe thei a ni, a ti.
He hunah hian Mizo rimawi hmanrua chi hrang hrangte pholan niin, a hman dan a taka entir a ni bawk.
Khawvel pumpuia Museum hrang hrangten ni bik, a ruala an hman tlan turin Inter-National Council of Museum-in kum 1977 khan May 18 hi International Museum Day atan a puang a, kumina he ni thupui chu “The Power of Museum”, tih a ni.
Mizoram State Museum hian kum 2019-2020 sawrkar kum chhung khan tlawhtu mi 19,971 an nei a, heng zinga mi 8 hi VIP an ni a, ramdang aṭanga lo kal mi 79 an nei bawk.
Tunkar Zirtawpni thleng hian Mizoram State Museum hi en man awm lovin hawn a ni dawn a ni.