Lengpui Airport runway-ah hmun thumah khuar a awm a, thlawhna lian ṭum nan a hlauhawm theia ngaih a nih avangin Airport Authority of India (AAI) chuan runway a khar a, nimin khan thlawhna thlawkchhuak tur leh ṭum tur zawng zawng cancel a ni ta a ni.

Hemi chungchangah hian Congress party chuan thuchhuah siamin, Lengpui Airport runway siamṭhatna tur hi Congress hunlai khan vaibelchhe engemawzat dah a ni a, MNF sawrkarin sum siamna atana hman a duh avangin hetiang lama thiamna bik nei Company-te thawhtir a phal lo a, hna a ṭhat tawk loh avangin siamṭhat a ngai leh ta a ni, an ti a, furpui thlen hmaa ruahsurin a tichhia chu hriatthiam theih loh a ni tiin, thil zahthlak tak a ni an ti bawk.

Lengpui Airport-a thlawhna cancel a nih avang hian zin miten harsatna an tawk nasa hle a, zinchhuak tur leh haw tur za tam tak an tangkhang a, sum leh pai tam tak a luanral phah a, sawrkarin Airport a enkawl ṭhat tawk loh vanga zin veivak mi za tam takin harsatna an tawk chu pawi an tih thu leh MNF sawrkar chu a rang thei ang berin a siamṭha tur leh, runway maintenance ṭha lo chungchanga mawhphurtu dik tak zawngchhuak a, hrem ngei turin an phût bawk a ni.