Nimin khan ZPM Gen. Hqrs. Executive Committee chu Dawrpui Multipurpose Centre-ah Lalliansawta, President kaihruaiin an ṭhukhawm a, he hunah hian party constitution thar, ruahmanna lo awm tawh chu siam ṭhat ngaite siamṭhat a nih hnuin pawm a ni a, hemi rual hian kum 2023 General Election lo awm tur atan ZPM Policy pawm a ni bawk.
ZPM Executive Meeting vawi khatna chuan resolution 5 an siam bawk a, an resolution-ah chuan Val Upa Council-in kum 2023 MLA General Election lo awm turah ZPM Chief Ministerial Candidate atan Lalduhoma a puansak chu lawmawm an tih thu an sawi a, April ni 28, 2022-a ZPM Val Upa Council ṭhukhawmin party-a dinhmun pawimawh chelhtute leh MLA candidate turte ruihtheih thilin a tihbuai loh an ni ngei tur a ni, tih resolution an siam chu ṭha an tih thu leh, ZPM hruaitute chuan zawm ngei nise an ti bawk.
Union Territory (UT) kan nih aṭangin kum 50 zet a lo liam tawh tih tarlangin, he hun chhung hian PC party-in term khat leh a chanve a hruai bakah hian President Rule-ah awm leh zeuh tih loh chu Congress leh MNF sawrkarna hnuaiah kan awm ta char char a, hetiang hi a nih avangin ko thlak a hun ve ta nia Zoram mipui ngaihdan chu an ṭawmpui tih an sawi a, Zoram mipuite beiseina tihlawhtling a, kum 2023-a sawrkarna siam ngei turin ZPM chuan theihtawp a chhuah dawn tih an sawi a, tun ṭum MNF sawrkarna hnuaia kan ram dinhmun thlirin, kawng engkimah a lungawithlak loh an tih hu an sawi a, hmasawnna hnathawh hrang hrang ṭhuanawp chhan leh ram inrelbawlna harsatna chhanah MNF sawrkar hian hrileng chuanlam mahse, hei hi chuanlam tlingah ZPM chuan an ngai lo tih an sawi a, Zoram mipui ten beiseina sang tak ZPM-ah an nghah ang ngeiin, khawvar eng mawi tak hmuhtir chu kan tum ber a ni tih an sawi bawk.