Mara Autonomous District Council (MADC) inthlanpui neih zawh takah, sawrkarna siam thei tur khawpa party chak an awm loh avanga hun engemaw-chen MADC-a sawrkar thar din theih a nih loh hnuah Indian National Congress (INC) leh MNF ṭangdun chuan sawrkar thar an din dawn ta a, nimin tlai khan inremna an siam a ni.
Thudawn danin, MADC-a sawrkar inṭawm siam dan tur ngaihtuah hian nimin khan Siaha-ah MNF leh INC hotute bakah MDC thlan tharte an ṭhukhawm a, nimin tlai khan inremna hi siamin, inremna an neih dan chuan, Chief Executive Member (CEM) dinhmun chu INC-in an chang ang a, CEM tur hian Phura bial aṭanga INC ticket-a thlan tlin H.Malvin-a’n a chelh ang a, Dy. CEM leh Chairman chu MNF-in changin, Dy. CEM-ah hian Amotlah bial aṭanga MNF ticket-a thlan tlin HC Lalmalsawma Zasai-in chelhin, chairman chu Siaha South -II atanga MNF ticket-a thlan tlin N.Viakhu, MNF in a chelh dawn bawk a ni.
Heng bakah hian INC-in Executive member (EM) pathum an chan bakah, nominated seat 3 awm aṭangin 1 an chang ang a, nominated seat 2 dang chu MNF-in an chang thung dawn a, hei bakah hian MNF chuan EM 5, Deputy chief whip, Vice chairman (Planning) an chang bawk ang.
Thawhhona sawrkar thar din tura inremna a awm theih tak avang hian naktuk, May 18, 2022, Nilaini hian chairman thar thlanna buatsaih a ni ang a, chumi hnuah Governor pawmpui turin thlen a ni ang.
Tarlan tawh angin, MADC inthlanah khan BJP-in seat 12 an la a, MNF-in seat 9 leh INC-in seat 4 an la a, party mala sawrkar siam thei tura seat lak ngai zat 13 la phak an awm lo a ni.