Mizo Students Union (MSU) rorelna sang, Federal Body Meeting chuan Mizo zirlaite tan Special Scholarship scheme siam a nih theih nan MSU-in hma la rawh se tih an pass.
MSU Federal Body Meeting 2022 chu May ni 12 & 13 khan Thingsaiah neih a ni a, ni 13 zan khan Palai thlahna inkhawmah MSU president J. Lalmuan-zuala chuan kum 30 chuang Mizoram sawrkarin a theihnghilh tawh Zirlaite tana Study Tour Budget siam theih a nih chuan Mizo zirlai thiamthei falte tan India ram pawn lama thiamna kan hmuh theih ang apiang zirna kalpui turin he scheme hi siam theih a nih lohna tur a awm lova, hemi atan hian Political Party hrang hrang hruaitute titipui an ni tawh a, MSU-in zirlai kan hmuh hmasak berah na takin kan nawr ang a ti.
MSU president chuan Chawngte khuaa veng pakhat hminga College hming dah a ni chu hriatthiam har a tih thu sawiin, hnam bil anga kan zirna in sang ber dah a ni chu MSU chuan tha kan ti lova, sawrkarin Govt. Chawngte College tia a thlak lo a nih chuan MSU chuan kan thiam dan angin kan thlak ang a ti a, Mizoram chhunga Public Sector Undertaking hnuaia hnathawk te Local Language Proficiency Test diktaka kalpui anih theih nan MSU chuan chhui chian a nih tur thu a sawi a, Inner Line Permit (ILP) chungchang pawh sawi telin tun aia nasa a uluk zawka kalpui anih theih nan tan lak a nih tur thu a sawi bawk.
Palai thlahna inkhawm-ah hian Higher & Technical Education changtu Minister leh bialtu ni bawk Dr. R.Lalthangliana chu khuallian a ni a, khuallian chuan MSU Federal Body Meeting 2022 a bial chhung Thingsai khuaa nghah a ni chu lawmawm a tih thu sawiin, zirlai pawl chu Mizo Nationalism chungchangah huai taka ke pen thin an nih thu leh hnam hmangaihna tak tak pu chunga chak taka ke pen theuh turin rorel palai kal khawmte a fuih a ni.
Hemi ni chhuna rorel inkhawm neihah Government Kamalanagar College tih chu Government Chawngte College tia thlak a nih theih nan MSU-in hma la rawh se tih te, Mizoram chhunga Public Sector Undertaking (PSU) hnuaia hnathawkte Local Language Proficiency chhui chian ni se tihte an pass a ni.