Mara Autonomous District Council (MADC) inthlan vote thlak turin ni 2 chauhin a dang tawh a, Party tinin campaign an bei ngawrh hle a, nimin khan hmun hrang hrangah ah party tin ten campaign an chhunzawm.
Nimin khan MNF Adviser leh Minister Lalruatkima chuan Siaha Press club-ah Press mite kâwmin MADC inthlan lo awm turah MNF sawrkar thar a piang ngei dawn a ti a, MNF party chu an tling ngei dawn tih a sawi a, Lalruatkima chuan MNF sawrkar hnuaiah Siaha District chhung hmasawnna hrang hrang hnathawhte tarlangin, nasa takin ram hmasawnna hna kalpui a nih thu a sawi a, project kal lai leh hmachhawp ṭhahnem tak a tarlang a, SEDP pawh Vety Dept leh Sericulture-ah Pilot project-ah chhungkaw 2000-ah bulṭan a nih thu a tarlang bawk.
Siaha Bazar Traffic point-ah BJP District Hqrs Siaha-in Public Meeting an nei a, hetah hian Union Minister of Sate for Minority John Barla chuan thu sawiin, MADC General Election a BJP anga inthlan an hmachhawn hmasak ber a ni a ti a, BJP candidate an thlan tlin chuan Sixth Schedule Amendment an tihlawhtling dawn tih a sawi bawk.
Union Minister chuan MADC tihhmasawn nan central aṭangin cheng nuai 40,000 MNF kaihruai state sawrkar kutah an pe a ti a, hnathawhna tur sum an pek tam tak chu a project-ah ni lovin thil dangah an her tih sawiin, thuneihna lian zawk petu tur BJP candidate te vote ngei turin a sawm bawk.
Nimin vek khan DC Conference Room-ah MADC Election-a duty tur Presiding officer leh 1st Polling officer-te duty-na hmun tur Randomisation neih a ni a, Presiding Officer 106 leh 1st Polling Officer 106 Training pek an ni.