ZPM President Lalliansawta chuan hun rei tak hman theih loha awm, Aizawl Civil Hospital CT Scan chu ZPM hruaituten vawi thum a hmunah an enfiah tawh tih sawiin, “Thla ruk chhunga bun fel theih a ni lo hi a mak ngawt mai, ZPM chuan kan enzui zel dawn a, kan sawrkar hian hetiang zela mipui min ngaihthah chuan kan thiam dan angin ZPM chuan hma kan la ve dawn a ni,” a ti.
He thu hi nimina ZPM Office, Aizawla chhung inkhawm leh mi thar lawmluhna hun hmannaah Lalliansawta chuan a sawi a, NABARD aṭanga sum puk hmanga sikul building thawm ṭhat chungchang pawh sawiin, report an dawng nasa tih a sawi a, “Kan hruaituten an zirchiang mek a, March ni 29, 2022 leh April ni 6, 2022 khan Education Department leh Aizawl North Treasury-ah RTI hmanga lehkha pawimawh an dil pawh a hun a zo ṭep tawh a, chhânna kan hmuh thuai kan beisei. Kan hriat thawi dan chuan hna zawhfel hmain Mizoram sawrkar hian contractor-te hnenah pawisa a pe niin kan hria a, chung lam aṭangin nawrtu na tak a awm a niawm mang e, kan ti a, RTI hmanga kan zawhna te chhan a nih hunah chiang zawka kan hriat theih kan beisei,”a ti bawk.