Bawlhhlawh aṭanga thil ṭangkai siam chhuah SEDP trade-ah telh
Urban Development & Poverty Alleviation (UD & PA) Department bultuma Mizoram pum huapa faina kawnga inelna an buatsaih ‘Mizoram Cleanliness Competition 2021’ lawmman semna hun chu nimin khan Vanapa Hall-ah neih niin, Dy. Chief Minister Tawnluia chuan he hun hi khuallian niin a hmanpui a, chawhnu lamah faina kawnga hmalakna hrang hrang inhrilhhriatna leh puanzarna programme ‘Swachhta Conclave 2022’ hman a ni bawk.
Deputy Chief Minister chuan thusawiin, kum 2014-a Hnam Pa Mahatma Gandhi piancham vawi 125-na thlen puala sawrkar laipuiin Faina Beihpui, Swachh Bharat Mission a thlaknaah Mizoram pawhin tun thlengin theihtawp chhuahin hma a lak zel thu a sawi a, Faina leh thianghlimna kawnga sawrkar hmalakna leh he thila khawtlang hruaitute leh tlawmngai pawl hrang hrangte thawhona leh ṭanho zarah Aizawl leh Mizoram khawpui dangte chuan faina kawngah hma an sawn chak nia a hmuh thu a sawi.
Bawlhhlawh hman ṭangkai leh sawngbawl kawnga sawrkar hmalakna ṭhenkhatte sawi zauin Department chuan Self Help Group-te hmang ṭangkaiin bawlhlawh aṭanga thil ṭangkai siamchhuah Waste to Earth ruahmanna a kalpui mek thu a sawi a, bawlhhlawh aṭanga thil tangkai siamchhuah leh bawlhhlawh ṭawih ral thei aṭanga lei ṭha siamchhuah home composting-te chu sawrkar flagship programme, SEDP hnuaia Trade thlan theiha ruahman a nih thu a sawi bawk.
He huna khualzahawm C.Lalmuanpuia, MLA; Vice Chairman, Veterinary, Fisheries & Sericulture Development Board pawhin thu sawiin Swachh Bharat Mission hnuaia hmalakna te chuan rah tha tak a chhuah mek thu leh hmasawnna tam tam tak hmuh tur a awm tawh a ni a ti bawk.
H. Lianzela, Director, UD&PA chuan Mizoram Khawpui Fai Intihsiakna buatsaih a nih chhan te leh kum hmasa lama kalpui anih dan te kalkhawmte hnenah a sawi.
He intihsiakna-ah hian Mizoram-a khawpui (Notified Town) 28-te chu Category 1 – Aizawl City (AMC – 19 Wards Competition), Category 2 – District Headquarters (10 district headquarters) leh Category 3- Other Urban Towns (17 Urban towns)-ah te ṭhen an ni a, Category tina lawmman pakhatna dawngtute hian ₹2,22,222/-, pahnihnain ₹1,11,111/- leh pathumnain ₹77,777/- bakah certificate an dawng ṭheuh a ni.
Hei bakah hian faina kawnga Local Council leh Village Council thawk ṭhate hnenah lawmman pek a ni a, Local Council leh Village Council-ah hian lawmman pakhatna dawngtuten ₹55,555/- dawngin, pahnihna-in ₹33,333/- leh pathumnain ₹11,111/- bakah certificate an dawng ṭheuh a ni.
Faina leh thianghlimna kawnga kum 2021 chhunga District Hqrs. hmasawn chak berah Hnahthial thlan niin, Other Urban town zinga hmasawn chak berah Khawhai thlan an ni bawk a, anni hian lawmman pawisafai ₹1,11,111/- leh certificate an dawng ve ve a, hei bakah hian khawpui hrang hrang aṭanga thlanchhuah Faina Pasaltha ‘Swachhta Warriors’ mi 9 hnenah chawimawina hlan an ni a, heng zingah hian Rohmingthanga (Tetea), Serchhip Bazar Veng pawh a tel a ni.
He hunah hian swachhata AMC Ward, District Hqrs. leh khawpui dang (Other Urban Towns) ranking puan nghal a ni bawk.
Lawmman dawngtute chu
Category-I (Aizawl City)
1st Prize: Ward XVIII
2nd Prize: Ward III
3rd Prize: Ward X
Category-II (District Hqrs)
1st Prize: Saitual
2nd Prize: Lunglei
3rd Prize: Mamit
Category-III
(Other Urban Towns)
1st Prize: Biate
2nd Prize: Ngopa
3rd Prize: West Phaileng
Best Local Council
1st Prize: Laipuitlang LC
2nd Prize: Salem Veng LC
3rd Prize:
Republic Vengthlang LC
Best Village Council
1st Prize- Ṭumpui, Kolasib VC
2nd Prize- Kawrthah Joint VC
3rd Prize- Dinthar, Khawzawl VC
RANKINGS
District Hqrs.
1 Saitual
2 Lunglei
3 Mamit
4 Khawzawl
5 Serchhip
6 Kolasib
6 Hnahthial
8 Champhai
9 Lawngtlai
10 Siaha
Other Urban Towns
1 Biate
2 Ngopa
3 West Phaileng
4 Kawrthah
5 Thenzawl
6 Zawlnuam
7 Khawhai
8 Lengpui
9 Phullen
10 Bairabi
11 Farkawn
12 N. Vanlaiphai
13 N. Kawnpui
14 Tlabung
15 Darlawn
16 Sairang
17 Vairengte