Zothlifim Logo
Loading ...

Mizorama Myanmar mi raltlan mi 30,000 velte chu chhinchhiah a, identity card siamsak a, pek an ni tawh.

Task Group on Myanmar Refugees hotute sawi danin Mizorama awm mek Myanmar raltlang 32,000 bawr velte chhinchhiah leh identity card pek chhuah hna hi tun May thla chhung ngei a zawhfel tum a ni a, Zirtawpni khan Task Group member-te leh district hrang hranga nodal officer-te chuan video conferencing hmangin hemi chungchang hi an sawiho a, an thlen chin tawhte inhrilhfiahin, tun thla chhung ngeia zawhfel tawh an beisei thu an sawi a, tun dinhmunah hian raltlan 30,000 bawr vel chu chhinchhiah an nih bakah identity card pekchhuah tawh an nih thu an sawi.

Myanmar-a sipaiin sawrkarna an pawnglak hnu leh sipai sawrkarna dodaltute ûmzui an nih avangin nikum March thla bul lam aṭang khan Mizoramah raltlan an lo lut ṭan a, kumin January thla khan Task Group hi sawrkarin a din a, raltlante chhinchhiah a identity card pekchhuah hna chu February thla chhunga zo fel turin a bituk a, mahse, Covid-19 hri leng a hluar thar leh avangin duh angin district hrang hrangah an thawk chak thei lova, hun pawhseisak an ni leh a ni.

Raltlan tam tak hi khaw hrang hranga relief camp 155-a an awm bakah mahni chhungkhat laina leh ṭhiante bel te, mahnia in luaha awmte an awm bawk a, relief camp-a awmte hi official-te’n luhchilha chhinchhiah leh identity card an siamsak hlan zel a harsat loh laiin mimal ina chêngte leh in luahte dapchhuah hna chu a hautak hle nia thudawn a ni.