Skip to content
Home » Chanchinthar » National Level Survey-in Mizoram sawrkar hmalakna thatzia a tarlang:Health Minister

National Level Survey-in Mizoram sawrkar hmalakna thatzia a tarlang:Health Minister

Health Minister Dr. R.Lalthangliana chuan sawrkar laipuiin tehfung hrang hrang hmanga a endikna (national level survey) chuan Mizoram sawrkar hmalakna ṭhatzia a tarlang tih a sawi.

Ministry of Health & Family Welfare, New Delhi leh Gujarat sawrkar ṭangkawpin an buatsaih “14th Conference of Central Council of Health and Family Welfare (CCHFW),” “Swasthya Chintan Shivir” tia sawi bawk, ni 3 awh, Tent City, Kevadia, Gujarat-a neih hmawrbawkna, Inrinni khan Dr. Thangtea chuan thusawina hun neiin he thu hi a sawi a, NITI Aayog-in kum 2017 aṭanga endikna a kalpui khai-khawmna “Healthy States, Progressive India”-ah Mizo-ram chu State tê ho (smaller states category) zingah pakhatna a ni, a ti a, Infant Mortality Rate (naupiang 1000 zela thi zat)-ah phei chuan kan chhuanawm hle a, kum 2009-a IMR 36 ni kha kum 10 hnu, 2019-ah chuan 3-ah a tla tawh a ni, a ti.

Dr.R.Lalthangliana chuan Mizoram sawrkarin hriselna kawngah hma a lak dan chungchang sawiin, Sub-Centre Health & Wellness Centre ṭha taka kalpui a nih thu te, ASHA/Health Worker-te hnathawh dan, damlote kalchilha, nau chhar thlenga an thawh dante a sawi a, thingtlang kilkhawr ber ber thlenga an fan chhuah ṭhin thu leh damdawi in awm lohna hmunah an ṭangkaizia a sawi a ni.

Dr.Thangtea chuan State danga awm ve lo Health Clinic Mizoram sawrkarin a ruahman thu pawh sawiin, tun dinhmun-ah Health Clinic 200 vel neih a nih thu leh, neih belh zel turin hma lak mek a nih thute a sawi a, Health Clinic chu Health sub-centre ang deuh a kalpui a nih thu leh, health worker pakhatin a enkawl thu te, khua/veng pakhat chin an huamtir ṭhin thu te, khawtlang hotute nen inrâwn tlanga hmalak a nih ṭhin thute a sawi a ni. .

Dr.Thangtea chuan COVID-19 hripui dona kawngah Mizoram a tiṭha tia an sawi chhan chu mi zawng zawng kan ṭanrual vang a ni, a ti a, hetiang hi hmun dangah a awm ve loh avangin sawrkar lian leh ram ropui tak takte pawhin an tawrh nasat phah a ni, a ti.

Health Infrastructure tihṭhat a pawimawh thu sawiin Dr Thangtea chuan Mizoram mai bakah India ram hmun hrang hranga harsatna tawh chu thawktu daktawr, nurse leh health worker-te indaihlohna nasa lutuk hi a ni a, chu bakah thingtlang kilkhawr leh hmun hla zawka chengten damdawi a hun taka an hmuh zung zung theihna turin ruahman-na siam a ngai a, hripui leng hmachhawn leh hun atan hetianga inpuahchah hi a pawimawh a ni, a ti.

Hei bakah hian Dr Thangtea chuan hripui leng hi khuarel chhiatna chi dang nen a inang lova, Central level-ah leh State level-a Ministry/Department hrang hrangte thawhho dan tur mumal taka ruahmanna siam lawk a ṭul a ti bawk.

CCHFW hi India Constitution Article 263 tlawhchhana din niin, India ram chhunga Hriselna (Health) kawnga sawrkar hmalakna chungchanga inrawnkhawmna sang ber a ni a, meeting-ah hian Health lampanga policy khawih pawimawh tak tak rel tura chhawp a ni a, Mizoram aṭangin Health Minister bakah hian Health Secretary R.Lalramnghaka leh Dr. Eric Zomawia, Mission Director, National Health Mission-te an tel a ni.

Leave a Reply

This site uses Akismet to reduce spam. Learn how your comment data is processed.