ZPM Leader Lalduhoma chuan Hachhek bial fangin khaw hrang hrang tlawhin vantlang inkhawm a nei a, heng a thusawina hmunahte hian Lalduhoma chuan, “ZPM chuan ramri kan vei a, kan ram chin humhalh kan duh a ni. Pathian leh mipui zarah sawrkarna kan chang ve hlauh te a nih chuan, ramri buaipuitu tur boundary committee kan din ang a, NGO-te nen ṭang tlangin consensus-in ngaihdan pakhat kan nei ang. Tunah chuan ramri bula intihbuaina chauh kan ngaihtuah a, status qou chiah kan thleng pha a, a aia thui kan kal a ngai. Ṭhenawmten an bawhchhe zel a, hma an rawn sawn zel a. Buaina a awmin kan inbe leh a, chuti reng reng chuan ram kan hloh hret hret zel a, ramri tak tak chinfel tumna awm lo,” a ti a, Assam ram chhunga awm mek Zohnahthlak, Thangram unaute pawh an theihnghilh dawn lo tih sawiin, “Kan political goal chu zo hnahthlakte rorelna pakhat hnuaia kan awm hi a ni a, a ni reng bawk ang,” a ti.
ZPM Leader chuan, “Sawrkar siam tura mipuiten an beisei ber chu ZPM kan ni a. Lawmluh sen loh mi thar hmuntinah an awm a, mipui kohna kan chhang seng lo, min thawhsaktu hi a awm a ni. India ram pumah Congress an tlachhia a. MNF lah vai smuggler-ho phenah an hotu pa ber Chief Minister a awm niin mipuiin an ngai a, candidate ṭha tak rawn nei leh mahse a lu berin a zir loh avangin an tla dawn, an hun a her liam mek,” a ti a, “A taima apiang dinchhuahna sawrkar, a thawkrim apiangin Mizo-ram budget an herchhuah hnemna sawrkar siam ang u,” tiin, “Pathian min pek he ram ṭha takah hian tih theih tam tak kan nei a. Tunah chuan kan thawkrim thlawn a, kâwng a na thlawn a, thlan a far thlawn a, kut a durh thlawn a, a thawkrim apiang beidawnna ramah kan inchhuah tawh a, sem policy-ah min hnuklut a, bungrua ang maia lei theiha lilam mek kan ni a, hetianga min siamtute lak atang hian i talchhuak ang u,” a ti bawk.