Zothlifim Logo
Loading ...

Mizoram Pradesh Congress Committee (MPCC) president Lalsawta chuan tlawmna nen Politics khelh a ngai tih a sawi.

Nimina Congress Bhavan, Aizawla MPCC Friday Political Session neihah Lalsawta chuan he thu hi sawiin, “Congress Party hi chapo taka kal tur kan ni lo a, tlawmna nen, mipui rawngbawltu kan nihna angin kan kal tur a ni. Congress party hruaitute leh member zawng zawngte chu khawi hmunah pawh dawhtheihna leh tlawmna nen kan nung tur a ni a, midang tana harsatna siamtu ni lovin, tanpuitu kan ni zawk tur a ni. Congress chu thil tak tak duh mi, hmasawnna tak tak thlentu ni a min hriat avanga miin ‘Cong-ress nge nge’ an tih thin hi kan vawng nung reng tur a ni a, a thaichhe zawngin tumah kan khawsa tur a ni lo,” a ti.

He hunah hian MPCC president chuan state danga rawngbawla chhuak tawh leh BJP Vice President lo ni tawh, Rev. Dr. LR Colney chu Congress party-ah a lawm lut a, Rev. Dr. LR Colney chuan thu sawiin, “Mizoram siamṭhat duh vanga politics-a lût ka ni. Mizoramah CM atana ṭha tur kan inzawrhsiak mek a, Lalsawta hi CM atana ṭha ber turah ka ngai. Mizoramin sum leh pai harsatna nasa tak a tawhna karah ṭha tak sum leh pai enkawl thiam, eirukna a fihlim Lalsawta hi Mizoram mamawh chhanna a niin ka hria a, a fit ber ka ring bawk. Lalsawta hi mi retheite tana innghahna tlak, Zofate tana Josefa buhzem siamtu tura Pathian ruatah ka ngai a ni,” a ti.