School Education Minister Lalchhandama Ralte chuan New India Literacy Programme hnuaiah ziak leh chhiar zirtir kawngah ṭanrual a ngai tih a sawi.
Nimina State Literacy Mission Authority (SLMA) Governing Council leh Executive Committee-te ṭhutkhawmnaah he thu hi a sawi a, Minister chuan thawktute mai bakah kohhrante leh tlawmngai pawlte chu ṭanrualpuiah sawmin ziak leh chhiarah Mizoram chu a sang ber pawl a nih avangin Mizoram zahawmna vawng nung a, tithangmawi zel turin ṭanrual a ngai tih a sawi.
Minister chuan Mizoram chu Digital Literacy lamah pawh an hniam lo a ti a, state dangte nena khaikhin pawhin a ṭha pawl tak an ni tih sawiin, chhiarpui neih hunah pawh NILP tehfungah ziak leh chhiar thiam chuan digital literacy a huam tel avangin heti lama an hmasawnna chu hmuh hmaih loh nise a ti a, ziak leh chhiar zirtirah school-a thawktute an rim deuh dawn a, chutihrualin kohhran leh tlawmngai pawlte pawh kut ke pawimawh an nih avangin theihtawp chhuah turin a sawm bawk.
Meeting-ah hian Samagra Shiksha SPD Lalhmachhuana chuan New India Literacy Prog-ramme (NILP) chu a sawifiah a, kum 2030-ah India ram mipui chu ziak leh chhiar thiamtir vek tum a ni a, he programme hian ziak leh chhiar thiam lo mi vaibel-chhe 5 te chu a tinzawn dawn a, kumtin vbch 1 zel thiamtir tum an ni dawn a ni.