Fall Army Worm pangang puang mek chuan Mizoram district 9-a vaimim chinna hmun ram hectare 580 chuang a khawih mek a, heng ramte hi chhungkaw 2997 enkawl mek an ni.
Agriculture Department thawktute sawi danin Fall Army Worm hian district 9-a khaw 214-ah Vaimim chingtu chhungkaw 2997 a nghawng mek a, tunhnaia ruahsur leh rannung thahna hlo an hman hma avangin nasa taka tuar an awmlo a, hmun ṭhenkhatah erawh vaimim ṭiak tir a kung leh a hnah a ei chhiat sawi tur a awm thung a ni.
District 9 zingah hian Lunglei district-a chhung-kaw 824 a nghawng a, Mamit District-ah chhung-kaw 722 nghawng bawkin, Serchhip District-ah chhung-kaw 470 a nghawng a, Aizawl District-ah chhung-kaw 359, Lawngtlai District-ah chhungkaw 292, Kolasib District-ah chhungkaw 219, Khawzawl District-ah chhungkaw 43, Champhai District-ah chhungkaw 38 leh Siaha-ah chhungkaw 30 a nghawng a ni.
Mizoram District zingah Hnahthial chu Fall Army Worm nei lo awmchhun niin, Saitual District aṭangin report dawn a la ni lo thung a ni.
Agriculture Department Director James Lalsiamliana chuan Fall Army Worm chu District hrang hrangah awm mahse vaimim huan neitute a nghawng nasa lutuk lo a ti a, huan neitute chuan department lam aṭang kher lovin anmahniin rannung thahna hlote siamin theihtawp an lo chhuah ve ṭhin a ti a, Vaimim chingtute leh department hotute’n pangang puangin vaimim a tihchhiat tam lohna turin ṭan an la zel tih sawiin, ruahtui a tlak tawh avangin vaimim tharchhuah a tlêm phah a rin loh thu a sawi bawk.
Fall Army Worm hi kum 2019 aṭang khan kumtinin Mizoramah a puang ṭhin a, kum dangah pawh vaimim tharchhuah titlêm lutuk khawp chuan chhiatna a thlen ngai lem lo niin, Agriculture department hotute chuan an sawi bawk.