Governor Dr. Hari Babu Kambhampati chuan sawrkar Department hrang hrangte chu mipui nawlpui thleng pha hmasawnna hna ngai pawimawh turin a chah a, sawrkar laipui scheme hrang hrangte chu mipui tana duan a nih angin mipui hnena hrilhhriat leh a hamṭhatnate pawh mipuiin an tel ngei theihna tura mawhphurna chu sawrkar hnathawkte leh Bank-a thawktute kutah thui tak a innghah thu a sawi.
Governor hian nimin khan Kolasib district tlawhin, Kolasib DC Circuit House-ah Kolasib district chhunga Department hrang hrang hotute a kawm a, Governor chuan Kolasib district chhunga rel kawng siam mek leh 4 lane kawng siam tura ruahmannate chuan inkalpawhna kawngah hmasawnna nasa tak a thlen tur thu leh Zofate tan leh state pawn mite tan pawh inlaichinna ṭha a thlen phah ngei a beisei thu a sawi a, Mizoram tan hmasawnna hmel thar a thlen ngei a rin thu a sawi. Mizoram chhunga kawlphetha siam chhuahna pawimawh tak pahnih Kolasib district chhung a awm te tarlangin intodelh theihna leh hralh chhuah tur thleng a siam chhuah theihna Mizoram chuan a neih thu a sawi a, chumi tur chuan ngaihtuahna sen a ṭul thu a sawi.
He hunah hian John LT Sanga, Deputy Commissioner, Kolasib chuan kalkhawmte lawmna thu sawiin, Kolasib district chanchin tlangpui tarlanna hun a hmang a, Serlui leh Tuirial tuikhuah hmanga kawlphetha siam chhuahna hmun Serlui B Hydel Project, 12 Megawatt leh Tuirial Hydel Project 60 Megawatt pe chhuak thei a awm thu te, inkalpawhna changtlung zawk a awm theih nana NHIDCL-ten 4-lane kalpui tura an ruahmannate leh rel kawng siam pawh chak tak a kalpui mek a nih thu a tarlang a ni.
Vanlalfaka Ralte, SP, Kolasib pawhin dan leh thupek kenkawh kawng a hnathawhna kalpui dan leh ramri venhim kawng a Police-te hmalak dan he hun ah hian a hmang bawk a ni.
Mizoram Governor Dr. Hari Babu Kambhampati chuan Circuit House, Kolasiba hun a hman zawh hian Counter-Insurgency and Jungle Warfare School, Vairengte tlawhin zanriah a ei nghal a. Vawiin hian Vairengte ramria Police duty-na hmun thlawhin hun a hmang leh ang a, Vairengte khaw chhunga sawrkar laipui scheme kalpuite a hmunah a tlawh dawn bawk a ni.