Governor Hari Babu Kambhampati chuan nimin khan Raj Bhavan-ah Urban Development & Poverty Alleviation (UD&PA) Department hotute kâwmin, khawpui leh khaw lian deuha hmasawnna ruhrel lian tak tak UD&PA Department-in a khawih mekte an sawiho a, he hunah hian PMAY-U, khawpuia cheng miharsate tana in sak tanpuina kalpui mek chungchang pawh sawiho a ni bawk.
Governor chuan UD&PA project pawimawh tak takte chu mipuiin an chhawr ṭangkai thuai theihna turin a thawktute chu ṭan la sauh sauh turin a chah a ni. PMAY (U) kalpui danah pawh hna a ṭha tawk nia a hriat thu a sawi a, sawrkarin a thawhna tur sum department hnena a thun veleh khawmuang lovin project kalpuituten chak takin hna an chhunzawm erawh a ngai nia a hriat thu a sawi a. PMAY(U) kalpui mek chu khawpuia cheng miharsa in hmun nei te chauh tana in sak tanpuina ni bik lo se, khawpuia cheng chenna in la nei lo miharsa, in hmun la neilote pawh huam tir dan zawn ni se a duh thu a sawi bawk.
UD&PA hnuaia hmasawnna ruhrel thawh mekah hian cheng vbc. 5 aia tam senna tur project lian 9 leh a laihawl cheng vbc. 1 – 5 senna project 12 leh project tenau zawk (Minor works) 1024 a awm mek a ni.