Zothlifim Logo
Loading ...

Mara Autonomous District Council (MADC) Deputy Chairman thlanna nimin khan MADC Session Hall-ah neih a ni a, Dy.Chairman atan M.Manasia thlan tlin niin, heti hian MADC Executive Body tur tihfel a ni a, hetihlai hian Siaha District BJP chuan Dy. CEM chu post chu phuah-chawp a ni tih sawiin, ṭhiat lehnghal turin sawrkar an phût tih an sawi.

Nimina Dy. CEM inthlannaah hian M.Manasia, MNF MDC chuan vote 12 hmuin BJP aṭanga chuhtu T.Seido chuan vote 12 a hmu a, N.Viakhu, Chairman chuan CCB Rules-in thuneihna a pek angin casting vote hmangin M.Manasia chu vote ve-in tlingah a puang ta a ni.

Hemi hnu hian HC Lalmalsawma Zasai, Dy. House Leader leh M.Laikaw Eptu leader-ten lawmpuina thuchah tawi an sawi a, M.Manasia Dy. Chairman thar chuan lawmthu sawina leh house zahawmna kenkawh tlat a tum thu a sawi bawk.

Hemi hnu hian Chairman N.Viakhu chuan session chu tiamchin awm lovin a titawp zui a ni.

MADC ah hian sawrkarna pangai takin a kal thei tawh a, CEM atan Malvina leh Deputy CEM atan HC Lalmalsawma te an ni dawn a, Chairman ah N.Viakhu niin, Deputy Chairman atan M.Manasia bakah Executive member 8-ten sawrkarna an keng kawh dawn a ni.

Hetihlai hian nimin khan BJP Siaha District chuan thuchhuah siamin, MADC rorelna chu MADC Dan (Constitution, Conduct of Business Rules) hmanga kaihhruai a ni ṭhin a, CCB Rules kaihhruaina Dan-ah a awm loh chuan Governor of Mizoram phalna leh remtihnain MADC chu kaihhruai tur a ni tih an tarlang a, chutiang a ni laiin, Autonomous District Council-a Post awm ngailo Dy. Chief Executive Member post chu Governor of Mizoram phalna leh pawmpuina awm miah lovin MNF kaihhruai Mizoram sawrkar chuan Chief Minister Approval hmangin MADC-ah Dy. Chief Executive Member post an siam tiin an sawi a, hei hi Autonomous District Council Dan zah lohna lian taka an ngaih thu sawiin, a rang lama he phuahchawp Dy. CEM post hi ṭhiat leh turin Mizoram sawrkar an phut tih an sawi.

Hei hi Dy. Chief Executive Member post duhlo vang emaw, a changtu tur duh loh vang ni lovin, Autonomy pawngsuala state sawrkarin MADC-ah a duh dan anga a lo inrawlh ṭhin chu tun hnuah thleng tawhlo se an duh tih an sawi bawk.