Mizoramah Pradhan Mantri Awas Yajona – Housing For All (PMAY-HFA) Scheme hnuaia thingtlanga mi rethei insak ṭanpuina chu mi 5,511 in an dawng tawh a, kumin kum tawpah mi 17,500-in an dawn hman beisei a ni.
Rural Development Department-a Joint Secretary Irene Zohlimpuii Chongthu sawi danin, Mizoramah PMAY-Housing For All Scheme aṭanga insak ṭanpuina dawng tawhte chu mi 5,511 an ni a, kumin kum tawpah mi 17,500-ten an dawn hman beisei niin, nakum March-ah chuan mi 20,512-in an dawn theih beisei a ni a ti.
Joint Secretary sawi danin he scheme hmanga ṭanpuina hi Central-in za zela 90 a tum tur niin, state sawrkarin zaa 10 a tum dawn a, NE State nilo hmun dangah erawh Central-in za zela 60 tumin State sawrkarin za a 40 a tum thung a ni.
He scheme dawng tura thlante hian Swachh Bharat hnuaiah ₹12,000/- inthiarna siam na’n an dawng thei dawn a, National Drinking Water Programme hnuaiah tui connection a thlawna an dawn bakah Electric leh Gas Connection-te pawh a keng tel a ni.
He scheme-in a tum ber chu mi rethei in leh lo nei zo lote’n in an neih ve theihna tur a ni a, in chhe tawh takte siamṭhatna tur neilote tan leh khuarel chhiatna avanga mahni in chânte tana duan niin, chhungkaw member zinga hna thawktu awm lo leh eizawnna nei zo ve lote tana duan a ni.
Pradhan Mantri Awas Yajona – Housing For All Scheme hi kum 2016 November thla khan bul ṭan a ni a, he scheme hmang hian mi rethei in leh lo neilo tam takte in neihtirin, kum 2022 thlenga hman tura duan a ni a, amaherawhchu a hun chhung hi pawhsei niin, kum 2024 March thla thleng hman a ni dawn a ni.