Top seed Iga Swiatek chuan French Open title la tura beiseiawm ber a nihna chu a dik tih nemnghetin, Inrinni zan khan final-ah Coco Gauff chu straigt set-a hnehin a Grand Slam title pahnihna a la ta.
Kum 21 mi, Swiatek hian American tleirawl Gauff hi minute 68 chhung lekin, straight set, 6-1, 6-3-in a hneh a, hei hi a zawna WTA match 35 a chakna niin, tun kum zabi (kum 2000 hnu lam)-a chak zawn rei ber record Venus Williams siam chu a nih rual ta chiah a ni.
Swiatek hi kum 2020 khan he hmunah hian a lo champion tawh kum 18 mi, Gauff erawh major singles final a luh vawi khatna niin, a zâm deuh niin a lang a, Swiatek hi inkhelh chhungin kawng engkimah a chungnung zawk a, a zâwnin tournament 6-a a telnaah title a la ta a, a match hnuhnung 35-ah hian set 58 a khelh aṭangin set 56-ah hnehna a chang a ni.
Serena Williams hnuah Swiatek lo hi Grand Slam women’s singles title la ngei tura rinkai ber ni thei khawpa che ṭha an la awm leh lo a, kumin, 2022-ah hian Doha, Indian Wells, Miami, Stuttgart leh Rome-ahte a zawnin title a la a, March thlaa Ashleigh Barty a chawlh thut khan WTA world number one a ni a, khami hnu khan a chet ṭhat zui zel avangin WTA Tour-a a elpuite lakah pawh a kal fâl zel rih a ni.