Nimin khan C.Lalrosanga, MP (LS) chuan Post Master General, North East-1 Joseph Lalrinsailova chu Aizawl Dak Inpuia a pisaah tlawhin, MP chuan Post office kaltlanga mipuiin thil chi hrang hrang an inthawn ṭhinte a thlen har ṭhin avanga harsatna leh thil pawi eng eng emaw a awm ṭhin chu a ngaimawhawm a tih thu a sawi.
PMG thar Joseph Lalrinsailova pawhin thil thawn kal muang chu a ngaimawh hle tih sawiin, tunah hian Lengpui Airport-ah Cargo terminal a awm loh avangin by road-in thil thawn zawng zawng kalpui a ngaih thu leh Aizawl to Silchar-ah ni 1 a thang a, Silchar-ah ni 1 dang an lo dah leh a, chumi zawhah Silchar aṭanga Guwahati thlen nan kar khat te an hmang leh a, chutiang a nih avang chuan Aizawl to Delhi pawh hi kal chak ngaihna a la awm lo tih MP a hrilh a, hetiang aia chak tura beisei chu Aizawl to Kanhmun, Kanhmun to Agartala, Agartala to Delhi, chutiang tur chuan ruahmanna siam chho mek a ni a, tun ai hian thil thawnte pawh a kal chak zawk turah beisei a ni a ti a, Aizawl Head office hmunah bik pawh bungraw thleng reng rengte rei rial lovin a chak thei ang bera pek chhuah zar zar a ni tawh thu a sawi bawk. Thil thawn bo chungchang te, parcel chhunga a thawntuin a dah ni miah lo, thil danga lo thlak thlengte pawh hriat tur a awm ṭhin a, hemi chung-changah pawh a ṭul anga hmalak mek a ni tih sawiin, PMG chuan Lengpui Airport-a cargo terminal a awm loh avanga an harsatnate hriatpuia hma lo laksak ve turin MP chu a ngen nghal a, PMG hian MP (LS) C.Lalrosanga thlalak chuanna Stamp an siam thar chu a hnenah a hlan nghal bawk.
MP chuan Delhi leh Aizawl inkar ringawtah pawh thil thawn kal muang lutuk a ngaimawh avangin a muanna lai nia ngaih Kolkata lam postal hotupa Chief Post Master General, West Bengal Circle hnenah pawh lehkha ziakin a thawn tawh thu a sawi a, Lengpui Airport-a Cargo Terminal awm lo chu a ngaimawh thu leh cargo terminal chungchang hi Airport Asst. Director a lo sawipui tawh bakah, a ṭul angin Delhi lamah pawh bawhzui zel a tum thu PMG hi a hrilh a ni.