Tunlai ruahsur nasat avanga leiminin Mamit aṭanga Aizawl panna kawng National Highway 44A a hnawh pin chu tunkar chhungin a tlang a la beisei awm loh.
Ruahsur avang hian National Highway 44A Dapchhuah leh Dampui khaw hnuai inkarah nasa takin lei a min a, leimin nasat avang hian Dapchhuah leh Dampui khaw hnuai inkar kawng thar Dampui Diversion Road chu lirthei eng chi mah kal tlang theih loh turin leiminin a hnawh vek a, leimin hi a mual tawlh deuh avangin a nasa hle a metre 100 a thui kawng a hnawh a ni.
Kawng then fai hna hi Dapchhuah lam aṭang chauha thawh niin, Dampui lam aṭang a then fai hna thawh a awm lo a, mita hmutute sawi danin Dapchhuah lam aṭanga kawng then faina hmanrua pawh Front Loader 1 leh Tipper 1 chauh a nih avangin leh lei a tlak belh reng avangin hnathawh a sawtlo hle a, tun anga hna thawh a nih chuan hun a la duh rei dawn niin an sawi.
Hetih lai hian Mamit leh khawthlang aṭanga Aizawl kal turte chuan Dapchhuah leh Dampui inkar kawng hlui lamah an kal ṭhin a, kawnghlui hi chei hnum loh a nih avangin a chhe tawhin lirthei tê chi tan tlan a harsa hle a ni.