Skip to content
Home » Chanchinthar » Sialsuk PHC-a doctor chet dan chhuina sawrkarin ûmzuitlakah ngaiin Memorandum of Charge (Chargesheet) a buaipui mek

Sialsuk PHC-a doctor chet dan chhuina sawrkarin ûmzuitlakah ngaiin Memorandum of Charge (Chargesheet) a buaipui mek

Damlo chunga dik lo taka chea puh, Dr. Linda Lalbiaknungi, Sialsuk Primary Health Centre (PHC)-a medical officer chet dan chhui chiang tura ruat, Aibawk BDO-in a thil hmuhte sawrkara a thehluh chu ûmzuitlakah ngaiin, Mizoram sawrkara health department chuan ‘Memorandum of Charge’ (chargesheet) a buaipui mek niin thulakna chuan a tarlang.

Thulakna tarlan danin, Health & Family Welfare department-in ‘preliminary enquiry’ ti tura a ruat, Aibawk BDO-in sawrkara report a thehluh chu health department chuan ûmzuitlâkah a ngai a, tun dinhmunah Memorandum of Charge buaipui mek niin, Dr. Linda Lalbiaknungi pawh insawifiahna hun pêk a la ni dawn nia hriat a ni. Memorandum of Charge a chhui/puh a nihna a pawm chuan chhui ngai lo a ni ang a, chhui a nihna a pawm loh erawh chuan enquiry neih chhoh zel tur a ni dawn nia hriat a ni bawk.

Damlo chunga Dr. Linda Lalbiaknungi chêtdan leh damlo Lalrengpuia, Sialsuk chunga a thil tih dante’n tun hnaiah social media hrang hrangah sawi a hlawh hle a, Dr Lalbiaknungi chu damdawi in aṭanga Lalrengpuia hnawt chhuakah puh a ni.

Social media lama tarlan danin, Dr. Linda Lalbiaknungi hian canteen-ah ₹1,000 a tibo a, pawisa rutuah Sialsuk damdawi-ina damlo enkawl lai Lalrengpuia chu puhin, damdawi-in aṭangin a hnawt chhuak a ni. Lalrengpuia chu damdawiin aṭangin May 12, 2022-ah chhuahtir a ni a, May 13, 2022 zanah a thi niin sawi a ni.

Sialsuk PHC-a medical officer Dr. Linda Lalbiak-nungi chet dan leh damdawi ina damlo enkawl lai Lal-rengpuia chhuahtir chung-chang chhui chiang tur hian June ni 1, 2022 khan Aibawk BDO Chinlianmanga chu sawrkarin a ruat a, June 10, 2022 ral hmain HFW Secretary hnenah report thehlut tura tih a ni a, Aibawk BDO in huntiam chhungin a report sawrkarah a thehlut a ni.

June ni 2, 2022 aṭang khan Dr. Linda Lalbiaknungi hi chawlhtir (suspend) a ni a, hotu lu atanga phalna la hmasa lo chuan Aizawl chhuahsan lo tura hriattir a ni bawk a, Sialsuk PHC vil rih turin ZMC-a medical officer Dr HJ. Lalnunpuia a ruat a, a hna pangngai bakah chawlhkar khatah vawi 3 tal Sialsuk PHC tlawh tura tih a ni.
-Zalen

Leave a Reply

This site uses Akismet to reduce spam. Learn how your comment data is processed.