Skip to content
Home » Chanchinthar » CWG 2020-a Mizo medalist-te chawimawina hun sawrkarin a buatsaih

CWG 2020-a Mizo medalist-te chawimawina hun sawrkarin a buatsaih

Commonwealth Games 2022 Birmingham-a neih zawh taka India ram aiawha kal zinga Mizo medalist pahnih – Weightlifting 67 kg-a Gold Medal latu Jeremy Lalrinnunga leh Women’s Hockey-a Bronze Medal latu Lalremsiami-te chawimawina chu Zirtawpni zan khan Vanapa Hall-ah buatsaih a ni a, Chief Minister Zoramthanga chuan he hun hi a hmanpui a ni.

Gold medal dawngtu Jeremy Lalrinnunga hi Mizo-ram sawrkar chuan cheng nuai 25 a pe a, Bronze Medal la tu Lalremsiami hi cheng nuai 7.5 a pe bawk a ni.

Chief Minister chuan medalist-te pahnih a lawmpui thu leh, an hlawhtlinna chu ropui a tih thu a sawi a, hlawhtlinna chang tura an beihna leh tumruhna leh an chhungte tawiawmna chu fakawm a ti a, Chief Minister chuan mahni chawr chhuahna chhungkaw khawsak sân leh sân loh chu hlawhtlinna leh thlen chin hriltu a nih vek loh thu a sawi a, mihringte chu thiam-na leh theihna neia siam vek an nih dan te, thiamna inang reng pawh a hmangtuin a hman dan azira mi hlawh-tling leh hlawh tlinglo, thleng thui leh thuilote inthlauhna a siam thin thu a sawi a. Kan nih theih kan potential thleng tur chuan tumruhna nen theihtawp chhuah a, theihna kan nei tih inhre chunga ke pen a pawimawh thu te a sawi a ni.

Home Minister Lalchamliana pawhin he hunah hian thu sawiin, sports ah thlen san leh ram hmasawnna hi kal kawp a nih thu a sawi a, tun tuma Mizo medalist-te pahnih chu an thalaipuite tana entawntlak an nih thu a sawi bawk.

Sports & Youth Services Minister Robert Romawia Royte chuan Mizoram sawrkarin sports chawisan ngai pawimawhin, thalaite mamawh phu-hrukna turin, hmasawnna ruhrel din kawngah leh kawng danga theihtawp chhuah a nih thu a sawi.

He hunah hian Gold medalist Jeremy Lalrinnunga, Weightlifter chuan infiamna lamah kan kal emaw, zirna lamah a ni emaw, hlawhtling tur chuan kan tumah chiang i la, midangin an tih ve vang ringawt lovin mahni tan bei zawkin, thawhrim piah lamah mahni invawn a pawimawh a tih a sawi a, Bronze Medalist Lalrem-siami, Hockey Player chuan a thalaipuiten a thlen aia sang zawk pawh an thleng thei a, infiamna khawvelah hian remchanna kan neih phawt chuan khawvel huapah chungnung takin a awm theih thu sawiin, a thalaipuite a fuih bawk.

SYS Secretary Dr. Lalrozama kaihhruaia he hun hmannaah hian Zothan-kimi, Hockey Mizoram President leh Lallianthuama, Mizoram Weightlifting Association President ten medalist te hlawhtlinna kal kawng an sawi a, Sports & Youth Affairs, Tourism & ICT Board Vice-Chairman TC Pachhunga chuan lawm-thu sawiin hun a khar a ni.

Leave a Reply

This site uses Akismet to reduce spam. Learn how your comment data is processed.