Nizan hmasa khan Saitual police-te chuan Saichal khaw kawngpuiah Myanmar kuhva bag 110 leh a neitu bakah lirthei khawlhtute an man a, kar kalta chhung khan khapna hnuaia a ruka tawlh Myanmar kuhva bag 395 chu police-ten an lo man tawh bawk. Hetihlai hian North Tripura-a Zampui Mizo Convention Youth Wing chuan khawchhak kuhva dan loa tawlh/a ruka phurh chu an duh loh thu leh an dodal zel tur thu an sawi.
Saitual police team te chuan nizan hmasa khan chuan Saichal khaw kawng-puiah lirthei lian chi pahnih aṭangin kuhva bag 110 an man a, kuhva rah neitu leh lirthei khalhtute, Lalchhuan-awma (24), Champhai, Zotlang leh Ramdinthara (34)-te an man tel nghal a, dan bawhchhiatna chi hrang hrang tihtawp nan englaipawha mipui puihna an mamawh reng tih police thuchhuah ah tarlan a ni.
Kar kalta chhung khan Khawlzawl district chhung Tuipui khaw bulah Myanmar kuhva bag 265 leh Zawlnuam ah bag 130 man a lo ni tawh bawk a ni.
Hetihlai hian Zampui MC-YW chuan thuchhuah siamin, khawchhak kuhva dan loin West Phaileng – Tuipuibari – Kawnpui – Zampui kawng kaltlangin phai lamah a ruka phurh thlak (smuggled) ṭhin a ni tih an hriat thu leh an duh loh takzet thu an tarlang a, kuhva phurtute man chhuah an nih a, dan anga hrem an nih theih nan theihtawpin hma an la zel dawn tih an thuchhuahah chuan an tarlang bawk.