Zothlifim Logo
Loading ...

Mizoram State Commission for Women (MSCW) chuan social media-a mi pakhatin hmeichhe pakhat nau paw lai nia lang a sawisa lai video vawrh darh chu Mizoram chhung ngei a thleng nia ngaih theih a nih thu leh, video a lang chin bakah thil tam tak, hmeichhia leh naupang/nausen chungah kut inthlakna leh hleilenna dang a thleng ngeia ngaih theih a ni tih tarlangin, thubuai an ziaklut a, a rang thei ang bera pawikhawihtu man a, dan anga hremna pek a nih ngei theih nan theihtawp chhuaha hma la turin state police te a hriattir.

Hemi chungchanga thupek an siamah MSCW chuan, August ni 15, 2022 khan social media-ah mi pakhatin hmeichhe pakhat nau paw lai nia lang a sawisa lai video, second 30 vel bawra sei chu vawrh darh a ni tih tarlangin, Video-ah chuan Mizo tawng an hmang a, chuvang chuan he thil thleng hi Mizo-ram chhung ngeia thleng nia ngaih theih a ni, a ti a.

Ngun taka thil awm dan thlir a nih hnuin video lo lang hmeichhe nau paw lakah hian hmeichhe zahawmna leh dikna chanvo tihbawrh-banna nasa tak a thleng ngei niin commission chuan a ngai a, nunrawng taka kut inthlakna thleng nia lang chu rang taka chhui chian ngai niin commission chuan a hria a, hemi vang hian commission chuan ‘suo moto cognizance’ lâk ngei theihna tur case nia hria-in thubuai a ziaklut a ni.

Video a lo lang rang taka chhui chian a nih theih nan leh a tak ngeia thleng a lo nih chuan pawikhawihtu chu a rang thei ang bera man a, dan anga hremna pek a nih ngei theih nan thehtawp chhuah a hmala turin commission chuan state police-te a beisei a, DGP, Mizoram chu a tul anga rang taka hma la turin a hriattir nghal a, police te hmalakna thlen chin kimchang chu ‘order’ a tihchhuah ni, nimin atanga ni 7 chhunga ziaka commission hriattir turin DGP chu a beisei a ni.

He video a lo lang hmeichhia leh a fa chunga hliam leh na tawrhna thleng a awm a nih chuan an nufa dinhmun kimchang leh an hliam tawrhte enkawl zui a nih dan kimchang commission hnena report pe tel turin beisei a ni bawk.

MSCW chuan video hmuh nuam lo tak chu social media a tarlan zui zel a nih loh nan he video kawltu zawng zawng, sawrkar thuneitute tih loh chuan delete hram turin a ngen bawk a ni.