Zothlifim Logo
Loading ...

BJP Mizoram Pradesh chuan nimin khan Cyber Crime Police Station-ah FIR an thehlut a, tunlaia social media lama BJP ten India Constitution thar an duang anga an ziahna chungchang thehdarhtu chu dik lo taka mipui bum tumah puhin, man chhuak ngei turin Cyber Crime-ah hian FIR an thehlut tih an thuchhuah siamah an tarlang.

BJP Mizoram chuan tunhnai phai lam media thenkhata India Constitution thar buatsaih leh India ram Capital New Delhi pawh Varanasi (UP)-a sawn tur angin thuziak hmuh tur a awm, an ti a, Mizoramah mi thenkhatin BJP beihna hmanruaah sawilutin, BJP-in Constitution thar an buatsaih, BJP-in Hindu-a min inlehtir vek an tum, tiin mipui tihthaih nan thu an vawrh darh mek a, he thil hi BJP Mizoram Pradesh chuan pawi kan ti hle a ni, an ti.

“Times of India Article thuziak leh thu bul bal neitute niawma sawi hi Central BJP leh Central sawrkar nen inzawmna a nei lo a, BJP hming ziahlan a awm lo bawk a ni. Tunlaia Central sawrkar leh Central BJP-in Independence kum 75-na denchhena thupui a neih zawk chu, ‘India is diversity – Hnam leh Sakhaw hrang hrang awmkhawm kan ni tih hi kan nihphung leh khawvel min pawm dan a ni a. India chhungah hnam tenau tawng zawng zawng pawh inhriat pawh tura mitinte inzir leh tan lak a ngai,’ tih a ni,” an ti.

Kum 1946-50 bawra India Constitution Drafting Committee B.R. Ambedkar, BN Rau leh Member 20 zet tih loh kha chu, India Independence kum 75-na chhung hian India Constitution thar siam turin Drafting Committee din a la awm ngai lova, Parliament emaw President of India-in hetiang Committee hi an la siam leh lo a ni, an ti bawk.

Hindu, Muslim, Buddhist, Christian leh sakhaw dang te’n, pawl chhung atanga India Constitution hi lo siam thar tur chi a ni lo, BJP Mizoram Pradesh chuan an ti a, “Kristianna chungchanga kan mithiam te’n Mizo mipuite min sawithaih fo te, kan rinna tinêp zawnga sakhaw danga inlet mai tur anga min zirtir fo te hi a pawi kan ti a, Kohhran mite thlarau chawm zawnga thusawi thei lo te’n rinna kawnga hniam zawkte ti thlabar zawnga hma la fo lo turin kan ngen bawk a ni,” an ti.