Zothlifim Logo
Loading ...

India ram percentage aiin a lêt 10-in a sang zawk

Mizorama HIV/AIDS vei tam lam percentage chu India ram puma HIV/AIDS vei tam lam percentage aiin a lêt sawmin a sâng zawk a, kumtina Mizorama HIV/AIDS vei punna chuan hniam lam a pan thei lo.

He thu hi nimina Health Minister Dr. R.Lalthangliana hova Assembly Annex Conference Hall-a HIV kai awlsam zawk tura ngaihte leh dinhmun hlauhawma ding mekte tana ṭanpuina (Harm Reduction programs) chak zawk leh nasa zawka kalpui dan tur sawihona leh inrawn-khawmna neihah sawilan a ni a, he hunah hian HIV/AIDS dona kawnga thawk-tu line department zawng zawng te, kohhran hruaitu te, NGO te leh AIDS veite enkawlna kawnga thawktute an tel a ni.

Sawihonna leh inrawn-khawmna hi hun hnihah ṭhen niin, heng hunah hian HIV kai hlauhawm zuala ding nia ngaih ruihhlo timi te, mipat hmeichhiatna kawnga buan chaklo deuhte’n HIV an kai lohna tura enkawlna hmun Drop-in-Center veng hrang hranga NGO kaltlanga kalpui mekte chu chak zawka kalpui a nih theih nan Harm Reduction program thil tum te, an hnathawh kalphung te, Drop-in-Center-a kal ṭhinte an enkawl dan leh a kalte’n an ṭangkaipui dante sawiho a ni a.

HIV chu enkawl theih nimahse, kai tawh chuan tihdamna awmlo a nih avangin a darh zel loh nana hmalak a pawimawh takzet thu te, kan rama HIV darh nasat dan te, HIV chu nungchang kaihhnawih natna a nih dan te, ṭhalai HIV kai an pun zel chuan kan ram a nghawng chhiat nasat dan turte zau taka sawiho a ni a, he natna avanga chhiatna thleng mekte leh harsatna lian zawk thleng theite vêng tur chuan sawrkar department hrang hrangte, tlawmngai pawl (YMA, MHIP, MUP, Zirlai pawl, etc.,) branch hrang hrang te, kohhrante ṭanrual leh ṭanho, inpuih tawn a ngaihziate uar taka sawiho niin hmalak zel dan turte relho a ni a, kohhran, NGO-te leh Line Department aiawha kal khawmte chuan HIV/AIDS dona kawnga thawho zel an remti tlang a ni.

Health Minister chuan HIV/AIDS chu ṭanrualna nen hneh theih a ni a ti a, Covid-19 hripui leng dona kawngah Kohhran te, NGO te leh Media-ten theihtawp an chhuaha sawrkar an ṭanpui ang khan HIV/AIDS dona kawngah tha tharin sawrkar thawhpui leh se a duh thu a sawi a, “Tunah hian kan dinhmun hi a ṭha lo hle a, India ramah pawh he natna bikah chuan kan dinhmun a ṭha lo fal hle a, Mizoramah he natna ṭihbaiawm takin tlem lam apan theih loh chhanah mitinten mawh kan phur tih kan pawm tlan a ngai tawh a ni,” a ti a, HIV/AIDS vei leh Cancer vei tamna state anga kan state lang mek chu kan vei tlan a, siamṭhat hna thawh kawngah kan inlungrual phawt chuan heng natna vei tamna anga kan hmingchhiatna te hi kan thai reh thei a, chu aia pawimawh zawk mi tam tak nunna kan chhanhim thei a ni, a ti bawk.

Dr. ZR. Thiamsanga, Vice Chairman, Health & Family Welfare Board pawhin thu a sawi bakah Health Department hotute pawhin thu sawiin, HIV/AIDS chu tun dinhmuna kan chhungkuaa a la luh loh vanga inkuangkuahsan ngawt thei kan nih loh thute an sawi a ni.