Nimin chhun dar 12 khan Serchhip District TB Forum chu an chairman, District Bawrhsap Nazuk Kumar, IAS hovin DC meeting Room-ah an ṭhukhawm a, he ṭhutkhawma report petu Dr Lalnunhlima Khiangte, District TB Officer leh Member Secretary District TB Forum ni bawk chuan nikumah Serchhip District-ah TB thihpui 4 awmin, kuminah thihpui 3 an awm tawh tih a sawi.
Dr. Lalnunhlima Khiangte report-a a lan-danin, nikum khan Serchhip District-a TB vei enkawl zawng zawng chu 67 an ni a, kuminah TB vei enkawl 50 an awm bawk a ni.
Nimin meeting-ah hian TB leh HIV+ chu a inngheng hnai hle tih sawi niin, kuminah TB vei enkawl mek 50 zingah HIV+ mi 5 awmin, nikumah pawh 5 an awm bawk a, HIV+ vei hmuh chhuah thar 25 chu damdawi hmansual lama inhnamhnawih an ni a, nikumah mi 14 chauh an nih laiin kuminah a pun hluai chhan hi Drug a lo hluar tak vang nia ngaih a ni.
Meeting Chairman bawrhsap chuan hetianga drug avanga hri ṭha lo chi hrang hrang- HIV/AID, TB, Hepatitis leh a dangte titlem tura campaign awmze nei siama beihpuithlak hial ṭul a tih thu leh, Sub-Hqrs YMA report leh rawtna angin Myanmar raltlante avanga Drugs lo hluar a, a man lo hniam ta em em pawh a tihreh dah tur YMA, Police leh anmahni raltlante nen sawiho ṭha a tih thu a sawi.
Tunah hian Serchhip khawpui chhungah raltlan 284 an awm mek a, an zinga mi ṭhenkhat chu Myanmar leh Mizoram kar tawn ṭhin an awm avangin, anni hi Drugs laluttu nia rinhlelh an nih thu pawh sawilan a ni.
Nimin meeting-ah hian Doctor 4 bakah TB leh HIV/AIDS lama thawktute, Sub-Hqrs YMA president Kawlṭhuama leh MJA Serchhip District MJA President C.Lalhminghlua leh District Court aiawhte an tel a ni.
Warning: Undefined variable $post in /home/lahj9ae7in9c/public_html/wp-content/themes/newsup/inc/ansar/hooks/hook-index-main.php on line 117