May ni 9-a Chakma Autonomous District Council (CADC) inthlanpui neih tura chuh tumte tana hming pek luh hun chu vawiin, Thawhṭanni hian a tawp dawn a, political party hrang hrangten an Candidate tur an puang tawh.

Tun ṭum Chakma Autonomous District Council inthlanpui buatsaihah hian tun dinhmuna a landan chuan seat 20 awmnaah BJP, INC leh MNF-ten candidate tur an puang fel tawh a, bial 9-a an candidate turte ZPM chuan an puang ve tawh bawk a ni.

Party paliten an Candidate tur an puan zingah hian CADC-a Chief Executive Member lo ni tawh an awm ṭheuh a, BJP aṭangin CEM lo ni tawh Amit Kumar Chakma chu Rengkashya bialah a ding dawn a, INC aṭangin CEM hlui Adikanti Chakma chu Demdep bialah a ding dawn a, MNF aṭangin CEM lo ni tawh Kali Kumar Tongchangya chu Fultuli bialah a ding dawn a, ZPM aṭangin CEM lo ni tawh pahnih awmin Chhotapan-sury-ah Santi Jiban Chakma leh Vaseitlang aṭangin Bhudda Lila Chakma-te an ding dawn bawk a ni.

Candidate puan tawh aṭanga a lan danin CADC-a executive member la ni ngai lo mi thar hi BJP-ah 14 an awm a, INC-ah 17, MNF-ah 7 leh ZPM-ah 4 an awm a ni.

Inthlanna felfai leh muanawm a awm theih nan Lawngtlai DC, he inthlannaa Returning Officer David Lalthantluanga kaihhruaina hnuaiah ruahmanna hrang hrang siam niin, a tahtawlin bawhzui chho mek a ni.

CADC-ah hian MDC constituency 20 awmin, polling station 70 a awm a, vote nei thei mipa 18,208 leh hmeichhia 17,677, an vaiin mi 35,885 an awm a ni.