Keiṭum leh Khawlailung inkara Tuichang lui kânna tura Mizoram PWD-in lei a dawh (Double Lane BUSG Girder Bridge) chu nimin khan Chief Minister Zoramthanga’n a hawng a, he hunah hian Home Minister Lalchamliana chu khualzahawm a ni.
Tuichang lei dawh thar chunga hawnna inkhawm neihah Chief Minister chuan thu sawiin, Tuichang lei hawn tak chu Tuichang ral chhak leh thlang mite inkalpawhna pawimawh tak a nih thu sawiin, hawn a ni ta chu lawmawm a tih thu a sawi a, lei dawh awm hmasa chu 10 metric tonne chauh dawl a nih avangin lirthei lian leh rit zawk an kal theihna tur lei lian zawk mamawh a nih thu a sawi a, lei thar dawhnaah harsatna eng eng emaw tawkin, lei design chu thlak a ngaih avanga Central Roads Fund aṭanga sum hmuhin Wingwall atan Provision siam a lo nih loh avangin sawrkarah a thawh zawhna tur sum SASCI aṭangin cheng nuai 259.45 dah belh a nih thu a sawi.
Chief Minister chuan Mizoramah hman ṭangkai theih ram zau ṭha tak kan neih thu te, lui thelh sung, sik leh sa nuam tak, ruah tui ṭha bawk si kan neite hi kan vannei tak zet a ni a ti a, hnama kan chian a, ram hmangaihna thinlung nen hma kan sawn a, midang tan malsawmna kan nih theihna tura Siamtu ruahman a nih ngei a rin thu sawiin, mitin kan zawn ṭheuhvah dikna nen, thil ṭha zawk thlang zelin kan tih theih chin thawk zel turin kalkhawmte a sawm a ni.
Home Minister Lalchamliana pawhin thu sawiin, he lei siam kawngah harsatna neuh neuh tawh a ni chunga peihfel a ni thei chu lawmawm a tih thu a sawi a, Hrangturzo bial chhunga inkalpawhna kawng ṭha zawk siam ngai mamawh la awmte sawi langin a theih ang zela sawrkarin hma a lak tur thu a sawi bawk.
Lei hawnna inkhawm hi Lalhmasaa, PWD Joint Secretary-in a kaihruai a, PWD Engineer-in-Chief Er. C.Lalchhuana leh Contractor aiawh te’n technical report an pe a, Chief Engineer, Roads, PWD Er. Vanlalchhuana chuan lawmthu sawiin hun a khar a, he hunah hian Serchhip DC Nazuk Kumar leh district office hotu dang te, PWD hotute leh thawktute an tel bawk a ni.
Technical report aṭanga a lan danin, he lei siam nan hian CRF aṭangin cheng nuai 751.08 leh SASCI aṭanga cheng nuai 102.41, a vaiin cheng nuai 1010.53 senga dawh niin, lei thui zawng hi 68 metre leh a zau zawng hi 7.50 metre a ni a, tonne 100 vel dawl zo tura ruahman niin, M/S Sadguru Engineers & Allied Services Pvt. Ltd. Guwahati-ten an thawk a, ni 1.12.2016-ah lei dawh hna hi thawh ṭan niin, ruahmanna hmasa ang chuan ni 1.12.2018-a thawh zawh tur a ni a, mahse lei dawh dan tur (design) thlak a nih hnuah a zawh hun tur hi ni 1.12.2019 a sawn a ni a, Covid Hripui hrileng leh chhan dang dang avangin ni 31.3.2023-ah thawh zawh a ni ta a ni.