Sub Hqrs YMA Kolasib inkhawmpui Lungdaia nei mekah nimin khan rorel a ni a, palaite chuan agenda chhawpchhuah 16 zingah 8 an pass.
Kolasib SHYMA Inkhawmpui agenda zinga 10 chu YMA khawih niin 3 pass a ni a, an pass zingah hian – ‘Petrol Pump leh sumdawnna liana thawk tur hian ram leilung fate duhsak ni rawh se,’ tih te, ‘Aizawl aṭanga ruang chhuak te hi Central YMA-in an kuang tum/ngaihtuahsak ṭhin rawh se,’ tih leh ‘Sub Hqrs YMA Office leh Committee Room tihchangtlunna atan Sub Hqrs YMA huamchhunga YMA member tinah thawhlawm ₹10 khawn ni rawh se,’ tihte pass a ni a.
Sawrkar khawih thil agenda 6 lut zingah 5 pass a ni thung a, ‘Vairengte aṭanga Sairang inkar 4 lane kawngpui laih tur hi rang taka hmalak a nih theihnan SHYMA in hma la rawh se,’ tih te, ‘Sawrkar document hrang hranga YMA hriatpuina ngai tam ta lutuk hi tihtlem a nih theihnan SHYMA in hma la rawh se,’ tih te, ‘Samagra Shiksha hnuaia a thlawna lehkhabu sem (free textbook) kalpui ṭhin hi sikul luh ruala naupang indaih ngei pek a nih theih nan SYMA in hma la rawh se,’ tih te, ‘Phainuam to Bagha inkarah Excise & Narcotics deptt check gate dah tura thuneitute hnenah thlen ni rawh se’ tih bakah Kolasib tuitlan fintu luikawr dungah bawlhhlawh dalna/danna siam turin hmalak ni rawh se,’ tihte chu pass a ni bawk.