MNF chuan ZPM chu sawrkar ve hrim hrim chakatuihal huam huam leh tih hreh nei lovah an puh.

Nimin khan Aizawl Press Club-ah MNF media & publicity-ten media mite an kawmnaah an secretary VL Kroshnehzova chuan, “|ha ber leh thianghlim bera insawi ZPM chu sawrkar ve hrim hrim chakin an tui a hal huam huam a, tih hreh leh tih duh loh an nei ta lo,” tiin an din tirh lama an insawi ṭhin dan leh tuna an thiltihte chu a in persan ta hle niin a sawi.

M&PD Secretary chuan October 25, 2018 khan ZPM thuchhuah chuan BJP leh Chakma telna sawrkar neih lohna turin Mizo mipuite chu a mala sawrkar thei turin an siam a ngai niin an sawi tih a tarlang a, “Khatih laia an CM candidate Pu Lalduhoma thusawi an ziak a, ‘Kan ram tana Chakma hnawksakzia kan hria… MNF leh Congress hian MLA election apiangin Chakma Candidate an neih ṭhin thu pawh kan hria a ni lo’m ni?’ tiin Chakma candidate an neih ve loh tur thu a sawi,” a ti.

Chakma ramah ZPM an din loh tur thu pawh sawi fo in Chakma hua leh party dangte puhchhiatna atana hmang siin sorkar ve hrim hrim an chak luatah CADC-ah ZPM an din ta niin a sawi. Hei hi duh tawk lovin Mizoram political party dangte pawhin an tih ngai loh tiin ZPM Gen. Secretary Lalmuanpuia Punte chuan Chawngte-ah Chakma pa chawimawina pangpar ṭhi a awrhtir ta hial chu a zahthlak thu leh Mizo hnam tan a tlawmthlak hle ah an ngai tih a sawi.