Labour, Employment, Skill Development & Entrepreneurship (LESDE) Department chuan hnathawktute leh ṭhalaite tana a hmalakna pakhat atan May ni 9 leh 10, 2023 hian Millennium Centre Roof Top-ah, hna lak runpui, Mizoram Mega Job Fair a buatsaih dawn a, hnaruak chi hrang 1800 vel awm tura ngaih a ni.
LESDE Director Angela Zothanpuii sawi danin Mizoram Mega Job Fair-ah hian LESDE Department chuan ram chhung leh pawna sector hrang hrang a\angin company lian leh changtlungte sâwm khâwm-in, chu’ng company-te chuan Mizoram chhunga hna zawnglaite tan hnathawh tur a chhawpchhuahsak dawn a ni.
Job Fair kaltlang hian hna zawnglai leh company-te hian hamṭhatna insiam tawnin, tualchhunga ṭhalai hna neilo leh hna zawnglaite hnena hna ngelnghet leh rintlak zawk, tualchhung, ram chhung leh ram pawna an hmuh theih nan hun remchang an buatsaihsak dawn a ni.
He Job Fair-a company rawn tel tur thlan chhuah thuah hian tehna fung mumal tak hman a ni a, Company-te an rintlak dan te, an theihnate leh an changtlun dante LESDE Department-in uluk taka a enfiah hnua thlante an ni a, an registration chungchang thlenga mumal taka enfiah thlap an ni.
He fair-ah hian ram pawn leh ram chhunga Company-ten sector hrang hrang – Financial Institutions, Banking, Healthcare, Services, Automobile, IT, FMCG, Tourism & Hospitality, Beauty & Wellness etc. ah te hian hnathawk tur an chhawpchhuahsak dawn a, hna zawngtu thiamthil bik nei leh nei lemlote tan pawh a chhawrtu turte duhzawng mi an nih chuan hna an hmu thei dawn a ni.
He Fair-ah hian Company rawn tel zawng zawngte hian stall hranpa an nei ṭheuh dawn a, chutah chuan hna zawngtuten an qualification leh an tuina milin an stall te hi an dawr thei dawn a ni. Tin, heng Company-te leh hna zawngtute hi an inhmuhrem theih chuan a hmunah vek hian hna inpek nghal theih an ni dawn bawk a ni.