Serchhip District Police-te chuan nimin khan mipuite nena inpumkhatna ṭha leh thawhhona ṭha a awm theihna atan leh dan chungchang inzirtirna hun, Unity Ride cum Legal Awareness Campaign’ chu Serchhip District chhunga khaw ṭhenkhatah an nei.
Khaw hrang hrang tlawh tura thawk chhuak Police-te vai liamna hun hi nimin zing dar 6 khan Serchhip SP Office tualah hman niin, SP Vanlalnghenga, MPS chuan Police-te hna ber dan leh thupek kenkawhna kawngah leh, District chhunga muanna ṭha zawk a awm theih nan mipuite leh Police-te inkarah thawhona ṭha a awm a ngai a, hemi tihhlawhtlinna atan hian ‘Unity Ride cum Legal Awareness Campaign’ hi buatsaih a nih thu a sawi.
Police thawk chhuakte hi Addl. SP Saidinglian Sailo leh SDPO Kaste Romal-sawma kaihhruaina hnuaiah an thawk chhuak a, Hualtu, Hmunṭha leh Khawbel khuate an tlawh a, heng khuaa khawtlang hruaitute leh zirlai naupangte nen inkawmhona hun an hman bakah leh dân leh hrai inzirtirna hun hmangin dan hrang hrang – IPC, POCSO Act, MV Act, Wildlife Protection Act-te bawhchhiat-na leh a hremna hrang hrang bakah khua leh tui ṭha nihna kawnga mitin mawhphurh-nate inzirtirna leh zawhna hunte hmanho a ni bawk a, Police-te chuan mipuite chu thiltisualtu an hriatte ngawih bopui mai loa thuneitu leh Police-te hnena hriattir thuai turin an ngen a ni.
VDP-te hnenah an hnathawhna kawnga an mamawh tur Rain Coat leh Torch light pek an nih bakah thil dang pawh la pek zel tum a ni.
Kumin chhungin Ser-chhip District-ah dan bawh-chhiatna kaihhnawihah case 43 ziahluh tawh a ni a, Police post ruak hnawhkhah loh engemaw zat a awm avangin tun dinhmunah Serchhip District ah pawh Police indaih lohna a sang hle a ni.