Mizorama a vawi khatna atana Mega Job Fair buatsaih Dy. Chief Minister-in a hawng

Labour Employment, Skill Development & Entrepreneurship (LESDE) Department buatsaih Mizo-ram Mega Job Fair chu Millenium Centre rooftop-ah nimin khan Deputy Chief Minister Tawnluia’n a hawng.

Hawnna inkhawmah hian khuallian Tawnluia chuan Mizo thalai lehkha-thiam hna neilote tan Mizo-rama a vawi khat nana Job Fair buatsaih a ni chu lawmawm a tih thu sawiin, a buatsaihtu Department official-te leh LESDE Department changtu Minister Lalchhamdama Ralte chung-ah a lawm thu a sawi a, LESDE Department chu Department tenau anga lang siin a pawimawh hle a ni a ti a, hmasawnna duhawm tak thlentu leh rah tha chhuah thei department a nih thu sawiin, thalaite tana hmasialtu leh kawng sattu pawimawh tak a ni a ti a, thalaiten tangkai lehzuala an hman theih nan thawktute pawh thalai rilru pu a, hriatthiamna nena an department dawrtute lo dawng-sawng fo turin a chah bawk.

Dy. CM chuan Mizoram-ah thalai lehkhathiam tam tak an awm thu tarlangin, an tuina leh theihnate hmang tangkai turin sawrkar hnain a daih tawk lo a ti a, sawrkar pâwn lama hna tam takte chu dinchhuahpui tham a ni a, ei leh bar a intodelhna tur leh eizawnna kawng tha tak a ni tiin, nimin programme chu tangkai taka hmang turin kalkhawmte a fuih a ni.

Tawnluia chuan Covid hripui leng avangin kum 2 chhung hna lâk a khaihlak hnuah sawrkarin thalaite hmakhua ngaiin zawi zawi in recruitment a kalpui chho mek a ti a, amaherawhchu tun dinhmunah thalai hna neilo zawng zawng chan khawp a awm loh thu sawiin, sawrkar pâwn lama hna ngelnghet (sustainable employment) hmu thei tura tan la turin kalkhawm thalaite a chah bawk. Minister chuan Placement Agency kalkhawmte chu Mizoram thalai hna neilote chu danin a phal chinah duhsak turin a ngen nghal a, tunlai thalaite chu an taima a, thawh hreh an nei tawh lo chu fakawm a ti hle a, an hmaa hna chhawp-chhuahte chu chhel taka thawk zel turin a fuih nghal bawk. Skill development hmalakna hrang hrangah theihtawp chhuahtlan chuan kum reiloteah thalaiten ram an siam danglam ngei theih a rin thu a sawi a, fair buat-saih chu thalaite hmasawn-na leh changkanna, sum leh pai dehchhuahna kawnga kawng kawhhmuhtu a nih theih nan duhsakna a hlan nghal a ni.

Nimin Mizoram Mega Job Fair hawnna inkhawm-ah hian LESDE Secretary Lalramsanga’n lawmna thu sawiin hun a hawng a, LESDE Director Angela Zothanpuii’n report tawi pein Dr. JT Vanlalngheta, Joint Labour Commissioner, LESDE Dept chuan lawmthu sawiin hun a khar a ni.

Mizoram Mega Job Fair-ah hian LESDE Department chuan ram chhung leh pawna sector hrang hrang atangin company lian leh changtlung tak takte sawm khawmin chung company-te chuan Mizoram chhunga hna zawnglaite tan hnathawh tur a chhawp-chhuahsak dawn a ni.

He Job Fair kaltlang hian hna zawnglai leh company-te hian hamthatna insiam tawnin, tualchhunga thalai hna neilo leh hna zawnglaite hnena hna nghelnghet leh rintlak zawk tualchhung, ram chhung leh ram pawna an lo hmuh theih nan hun remchang buatsaih a ni. He Job Fair hian May ni 9-10 2023 chhung awh dawnin Millenium Centre rooftop-ah thalai hna zawng mekte tan career guidance stall telin hawn a ni dawn a ni.