Nimin khan Serchhip District Information & Public Relation Officer thar Lalnunmawii, MIS chuan Serchhip District MJA member-te chu a office-ah lengah sawmin, inhmelhriattirna leh inkawmhona hun an hmang.
He hunah hian DIPRO thar Lalnunmawii chuan thu sawiin, Serchhip District MJA-ten an lo dawnsawn danah lawmthu sawiin, I&PR leh MJA-te chu an hnathawhna kawngah inngheng hnai tak leh inmamawh tawn an nih angin Serchhip DIPRO hna a thawhna turah MJA member-te nena ṭha taka thawhhona neih chu a duh thu sawiin, mipui leh sawrkar tana an rawngbawlna pawimawhzia hre chunga a ṭulna apiangah inpeizawn chunga ṭha taka thawhhona nei turin a sawm a ni.
He hunah Serchhip District MJA President C.Lalhminghlua pawhin thusawiin, Serchhip District IPRO thar chu thinlung taka an lo lawm thu leh mipuite tana an rawngbawlna – thuthar lakkhawm leh thehdarh kawngah thawh-hona ṭha tak an neih ngei a beisei thu a sawi a, I&PR Department-ten an mamawhna apiangah Serchhip MJA-te chu an inpeih reng tih a sawi bawk.
Serchhip District MJA Gen. Secretary Zonun-sanga Kawlni chuan Serchhip District MJA dinhmun tlangpui a tarlannaah Serchhip District-ah MJA member 14 awmin, an zinga 3-te hi Thenzawla awm an ni.
He hunah hian MJA member dangte pawhin thawhhona ṭha an neih theihna tura an ngaih pawimawh zawngte an sawi bawk.