Nimin khan Aizawl District Bawrhsap Dr. Lal-hriatzuali Ralte kaihruaina hnuaiah Core Committee: Mission Chhanchhuahna (Phunchawng leh Rang-vamualte tana eizawnna tluantling ngaihtuahna Committee) chu Rangvamual local council house-ah an ṭhukhawm.
He Mission hi Rangvamual leh Phunchawng veng pahniha eizawnna mumal nei lo, zu zuar leh danin a phal loh hmanga eizawngte chhanchhuahna tur project a ni a, Debashish Mukherjee, Senior Social Scientist leh a team-ten zirchianna lo nei tawhin, an zirchianna aṭang hian sawrkar department hrang hrangin an scheme, loan leh service dang dangte eizawnna atana an hman theihna tur siam nan ṭanho a ṭul tih avangin Core Committee leh Working Committee hi din a ni.
He Mission hian a tum ber chu zu leh drugs hmanga an eizawnna an bânsan a, eizawnna ngelnghet zawk leh mi chengte pawh ram tana a mi hmantlak zawk leh khua leh tui ṭha zawk an lo nih theih nana hmalakpui leh dawmkanna tur kawng dappui a ni tih Chairman hian a sawi a, meeting-ah hian Core committee-te enpuina hnuaiah Rangvamual leh Phunchawng LC-te remruat angin Gram Sabha buatsaih ni se la, deptt-ten remchang ni hmasa berah Help Desk siama sawrkar scheme hrang hrang leh training, loan eizawnna atana an hman theih hrang hrang mipuite hnena hrilhhriatna hun bakah ṭanpui theih nana kawng hawn na hun siam ni se an ti a, Rangvamual leh Phunchawng Local council, YMA leh Kohhran hruaituten an vengchhung harsatna chi hrang hrangte thlenin meeting ah hian engtianga kalpui zel tur nge ngaihtuah ho a ni bawk. He Mission Chhamchhuahna atan hian Planning & Programme Implementation deptt chuan SEDP hnuaiah sum a tumsak a ni.