Tunhnaia Serchhip District chhunga vawk thi awmna, Khumtung khuaa vawk thite chu African Swine Fever (ASF) vanga thi an ni tih finfiah a nih avangin Khumtung khua chu vawk hri lenna hmun Infected Area-a puan a ni a, hmun danga vawk thite sample-ah erawh ASF hmuh a la ni lo.
Nimina Dr. H.Vanlalrawna, District AH &Vety Officer, Serchhip District-in hemi chungchangah hian dânin thuneihna a pek hmanga hriattirna tichhuakin, he hri a darh zel lohna turin hri len mekna hmun Khumtung khua chu nimin atanga thu leh awm hma atan vawk hri lenna hmun ‘Infected area’-ah puan a ni tih a tarlang a. Infected Area, Khumtung khua atanga vawk, vawksa leh vawksa atanga thil siam reng reng lakchhuah emaw, lakluh khap a nih thu a tarlang a, vawk thi reng reng paih mai lo a, chinai/disinfectant nen thûk taka phûm ngei tur a nih thu te, vawk talh leh vawksa zawrh khap a nih thu te, vawk thi an awmin, AH & Vety Department official-te hnena hriattir vat tur a nih thute a tarlang.
Hetihlai hian nimina New Serchhipa vawk thi awm chu AH & Vety department-in Rapid Test Kit hmanga an test-naah ASF an hmuh loh avangin sample laka thawn ngai loah an ngai a, tunhnaia Serchhip P&E Venga vawk thi awm pawh sample an test-naah ASF hri an hmu lo tih DVO chuan Zothlifim zawhna chhangin a sawi bawk.